Te ayera 2’or di atardi e update duna pa PR di departamento di Salubridad Publico (DVG), Jurette Croes a mustra cu den total 869 test a wordo haci, y entre diasabra y diadomingo, nos a keda na 64 caso positivo. Te ainda e edad maximo di persona contagia ta 79, y edad minimo 11 aña. Un curiosidad ta cu tin 32 hende homber y 32 hende muhe cu ta cay den e grupo di persona cu ta positivo.

Mientras cu nos tin 805 negativo. E cantidad di persona den cuarentena a sigui baha te cu 381 persona. El a splica cu e personanan aki a wordo controla pa e task force encarga cu e tarea aki.

Te ainda 1 persona a logra recupera apesar cu DVG tin mas persona na cas isola cu no ta presenta niun sintoma mas. Apesar cu nan a wordo getest, ainda e personanan aki ta sali positivo pa Covid-19. E tin di haber -segun PR di DVG- na diferente factor, entre nan e sistema inmunologico di e persona mes cu no ta recupera na e mesun momento. Tin un cu ta tarda mas, mientras cu otro menos. Esun hoben y bon di salud lo recupera mas satisfactoriamente, y nan ta genera anticurpa contra e virus aki, manera ta e caso cu bruela.

Pero otro factor tin di haber cu Aruba ta uzando un test cu ta hopi sensitivo pa e presencia di e virus aki den bo curpa. Awe pa 2’or atardi Dr. Wilmer Salazar ta bay papia mas amplio rond di e topico aki.

Panorama

Te ainda no tin un bista con largo e crisis aki ta bay dura tanten cu no tin un vacuna disponibel pa humanidad. El a bisa cu Aruba y mundo henter mester pensa con lo sigui deal cu e situacion aki. Ya cu e medidanan implementa te aworaki pa gobierno no ta pa semper, sino cu e ta un periodo tanten nos por yega soluciona e problema di e virus contagioso aki den nos comunidad.

E intencion no ta pa yega na cero transmision na Aruba, ya cu esaki lo haci nos situacion ainda mas dificil. Ya cu si nos ta yega na cero, Aruba nunca lo por habri su frontera mas. Logicamente ora cu nos ta habri nos frontera bek, nos lo sigui haya caso importa di Covid-19. E reto ta pa laga e cantidad di caso positivo no aumenta hopi na e mesun momento. Asina nos sistema di cuido medico por duna atencion y cuido na tur persona cu ta bira malo pa motibo di Covid-19.

El a sigui haci un yamada pa mantene nos distancia social, evita aglomeracion, laba nos man frecuentemente cu awa y habon, come saludabel, bebe suficiente awa y descansa. Di e manera aki nos ta lanta y fortalece nos sistema inmunologico, si eventualmente bo ta wordo contagia cu e virus.