Ayera mainta un otro bario a ser afecta un biaha mas pa interupcion di coriente pa via di un storing, e biaha aki tabata den un gran parti di area di Playa y e dia anterior na Balashi y bisindario.

Ta asina cu N.V ELMAR a informa ayera pa 8:21 di mainta cu nan sistema di seguridad den nan station a registra un storing den area di Ponton, Oranjestad, Post Kantoor, Belgiestraat, Dakota y vecindario. Nos tecniconan ta mobilisando pa atende cu esaki.

Pa 8:45 am un gran parti di Playa a haya suministro di coriente, despues pa 9:11 am dunando prioridad na schoolnan cu ta den examen, nan a suministra coriente den area di de La Sallestraat, Belastingkantoor y Solito un parti.

Pa 10:40 am area di Madiki, Ponton y vecindario a haya suministro di coriente y nan tabata finalisando pa tur cliente tin coriente back.

Igualmente, e mesun dia cu N.V ELMAR a tene un conferencia di prensa pa splica kico ta sosodiendo cu nan suministro di coriente, e biaha aki a registra un corto circuito ariba un switch den un di nan transformator station lagando sin coriente esta e area di Balashi, Oranjestad y vecindario.

Casi un ora despues, nan sistema di siguridad den nan station den area di Sabana Blanco a registra un otro storing

Nan tecniconan a mobilisa pa yega na e luga, pa 10:20 pm nan tabata trahando ainda pa identifica e causanan di interupcion y asina traha mas pronto cu tabata posibel, pa 10:55 pm algun areanan a cuminsa haya coriente y pa casi 1or di marduga mayoria di e areanan afecta tabatin coriente back.

Cu esakinan, ta 17 storing caba cu a tuma luga for di 26 di april ultimo manera e compania a anuncia diamars ultimo.

E situacion na N.V ELMAR na e momentonan aki segun Anthony Irausquin su director a splica, ta cu na 2021 nan a haya un retraso den e parti di mantencion unda den pasado e maneho tabata diferente, e tempo ey e maneho tabata pa enfoca mas riba expansion di grid y pa traha mas trafohuis, tur esey a trece consecuencianan aworaki door cu e maneho no tabata enfoca den mantencion di infrastructura.

“Si bo wak e crecemento acelera cu nos ta presenciando na e momentonan aki, e demanda di energia ta sumamente grandi y esaki no a ser premira den pasado,” el a sigura.

Nan ta den proceso pa un mantencion hopi grandi y acelera unda en bes di cinco aña nan kier haciele den tres aña “naturalmente esaki ta trece hopi retonan cune, pasobra material ta keda un reto pa nan por ricibi esey na tempo,” Irausquin a declara.