Oficina di Turismo di Aruba (ATA) ta cla cu un plan di contingencia pa atende cu cualkier eventualidad riba e fluho di turista for di nos principal mercado, despues di e situacion tenso y atentadonan cu a surgi entre Merca y Iran.
Directora di ATA, Ronella Tjin Asjoe-Croes a declara na Bon Dia Aruba cu lamentablemente esaki no ta e prome hecho cu a surgi di e dimension aki. Te aworaki no a wordo registra cancelacion cu por afecta e presencia di turistanan Mericano na Aruba.
“Ora mi ta bisa esaki ta monitor cu nos ta haci directamente cu hotelnan directamente na Aruba,” el a bisa.
Igualmente ATA ta den contactonan cu esunnan di Merca cu ta bende Aruba por ehempel Expidia. Den tur dos caso no tin ningun preocupacion ainda. Na e momento aki seguramente tur instancia den turismo ta monitor e situacion aki. “Turismo ta algo hopi serio pa Aruba y hopi importante,”el a agrega.
Den e caso di ATA nan ta tuma nan responsabilidad a base di analisis y cifranan pa comparti cu otro autoridadnan, incluso cu ministerio di Turismo tambe. Asina e mandatario titular di e cartera aki por sa kico ta e scenarionan cu lo por presenta. Esaki simplemente pa nos pais ta prepara si algo lo por yega di sosode, considerando cu e situacion cu a surgi entre Merca y Iran por ta cambiando tambe. “Bo no sa kico lo por pasa,” segun directora di ATA.
Antecedentenan.
E no ta desconoce cu den pasado situacion un poco similar tabatin su impacto pa Aruba. Pero tambe nos a yega di conoce tempo di recuperacion relativamente corto. Pa atende cu situacion asina semper a demanda fondo y activasion adicional pa por mitiga esaki.
El a indica cu den pasado tambe directamente nos a confronta e situacion cu a surgi despues di e desaparicion di e hoben Mericano, Natalee Holloway. For di tur e situacionnan aki nos a siña algo y specialmente pa atende y minimalisa e impacto cu echonan asina por tin pa nos industria turistico.
Tjin Asjoe-Croes a bisa cu den situacion actual di tension mundial, semper ATA ta analisa y bay bek con algo asina a yega impacta Aruba den situacionnan anterior. Pa haci esaki nan ta bay na e situacion cu a surgi na 2001 bin dilanti. Ora cu a surgi por ehempel un guera cu Irak y tambe e situacion di 9/11 relaciona cu e atentadonan terorista na Merca. E tempo aya nos turismo por a mira un caida inmediato entre 20% y 25%. Pero ya pa e prome mita di 2002 Aruba por a mira cu ya caba e mercado turistico di Merca a cuminsa bin bek.
Pa loke ta e caso Holloway na 2006 a registra e mesun tendencia di 2001, pero den tur dos caso segun directora di ATA nan a mustra bo cu si tin un caida di turistanan Mericano. Pero e tempo pa recupera ta relativamente corto den contexto, kiermen alrededor di seis luna bay ariba. E por dura un tiki mas tambe.
“Esey semper a wordo bisa di Aruba, con reciliente, Aruba ta,” el a bisa. E proceso di recuperacion lihe ta wordo mira den e cifranan tambe. Sinembargo mester bisa cu tanto na aña 2001 como na 2006, Aruba a bin cu accionnan adicional pa mitiga e impacto. “Si bo no a hacie kisas e ta dura mas. Kisas bo ta haya caidanan mas pisa,” el a laga sa.
Den tur dos nan tin calcula e caida den turismo averahe y nan tin calcula con esaki a afecta Aruba completo tambe. Igualmente impacto di e mercado Mericano riba e resultado total. Pero tambe nan a yega di hacie pa otro momentonan, por ehempel e crisis financiero na 2018. Directora di ATA a bisa na e matutino aki cu na tur instante nos mester tin cla kico lo por ta e impacto den cualkier situacion asina. Pero con nos lo bay remedi’e tambe.
E ta e factornan cu ATA ta teniendo na cuenta actualmente cu e conflicto entre Merca y Iran cu tin su impacto mundial. Basicamente ATA tin su procedura standard pa activa contingencia y planificacion considerando semper un situacion nobo cu a surgi aworaki.
