E ley nobo di Aduana ta canando su caminda y actualmente ta den e departamento huridico. E ley aki lo reemplasa completamente e ley actual cu ta data for di 1908.Pero pa awor lo no trece cambio den e tarifa.
Minister Angel Bermudez a declara na Bon Dia Aruba cu e ley aki ta mas cu 100 aña bieu, y e ta skirbi den un lenguahe cu ta treciendo confusion ora cu e ta wordo aplica pa gobierno haya su entrada.
E confusion aki ta afecta no solamente e clientenan cu ta les’e otro, pero e personal di Duana cu ta dun’e otro aplicacion, ya cu e ta skirbi den un idioma anticua.
Minister Bermudez ta spera cu e ley nobo di Aduana lo por bin cla prome cu fin di aña pa e por bay den vigor entrante otro aña.
“Esaki den nos afan pa optimalisa e generadonan di nos entradanan tanto di impuesto como di parti di Aduana”, el a bisa.
Entrada
E mandatario a indica cu e ley anticua di Duana ta un factor cu ta haci cu e efectividad di departamento no ta optimal. E mester ta optimal, ya cu gobierno tin dos generado di entrada cu ta resorta den su ministerio. Un ta oficina di impuesto y departamento di Aduana.
Nan ta trahando pa e organisacion di e dos departamento clave aki por funciona mas efectivo posibel. No solamente pa nan tin hendenan adecua y educa pa haci e trabou. Tambe nan ekiponan pa nan haci e trabou miho y e leynan mester ta adecuado pa aplica nan.
Encuanto si gobierno lo adapta e tarifa importacion cu Aduana ta aplica, e mandatario no ta kere cu esaki ta posibel aworaki, considerando e situacion economico global. E ta kere cu mas bien caminda cu gobierno por, nan tin cu reduci y crea incentivo pa asina stimula e actividad comercial riba nos isla.
Esaki ta e balans cu –segun minister Bermudez- gobierno ta busca ora cu nan ta trahando pa drecha eficiencia y efectividad di e dos departamento cu ta produci entrada pa gobierno. E mandatario a indica cu su ministerio ta trahando di un banda riba e parti di garantisa entrada, y di otro banda pa optimalisa trabou di ambos departamento cu ta genera entrada pa gobierno y di otro banda domina e gastonan.
