Te aworaki DVG no a haya niun caso importa di Covid for di Latino America

Ayera e ultimo informacion di Departamento di Salubridad Publico (DVG) riba casonan di Covid-19 registra na Aruba a mustra un total di 20 caso nobo di cual tur 20 ta residente y logicamente cero caso di no-residente. Pero esaki tabata ayera pasobra -segun Sharline Koolman di DVG- tin caso positivo di hendenan cu ta bin di afo.

Locual DVG por wak te cu aworaki cu na aeropuerto mas cu 29 mil test a wordo haci di locual tin 153 caso positivo. Di nan 103 caso tabata di ‘no-residente’ y 50 tabata di residente. Ta asina cu e 103 ‘no-residente,’ nan caso epidemiologicamente nan ta cosidera como caso importa.

Riba e parti di entrada el a referi cu esunnan considera “no-residente” tambe ta inclui un studiante Arubiano cu ta studia por ehempel na Hulanda, y no ta inscribi mas oficialmente na Aruba. E diferencia ta -segun Sra. Koolman- cu un persona di e cualidad aki no ta bay den e sector turistico, sino cu e ta bay un cas di famia. E diferencia pa DVG ta bira con nan ta controla pa e virus no plama mas.

Igualmente el a indica cu durante e ultimo lunanan te cu 7 di december cu pais Aruba a habri su frontera pa Latino America, te aworaki DVG no a haya ningun caso importa di e region aki. Sra. Koolman a añadi cu mayoria di caso importa cu nan ta hayando te cu aworaki ta bin for di Merca. E ta wak cu e situacion aki ta cuadra, mirando locual ta sosodiendo na Merca, locual ta habri e posibilidad cu eventualmente bo lo por importa algun caso.

E casonan cu ta wordo importa por wordo detecta na momento cu nan a yega Aruba y nan a test. Pero por ta asina cu e persona por a keda algun dia na Aruba caba y pa nan bay bek su pais of e ciudad na Merca, unda nan ta exigi un test, tin e chens cu e test por sali positivo. El laga sa cu tin e dos manera aki cu un persona considera ‘no-residente’ of turista lo por ta positivo na Covid.