Clayton Croes di GKMB ta lamenta cu den e accion nacional di fumigacion y eliminacion di criaderonan potencial y criaderonan activo pa e sangura aedes aegypti, ainda ta hayando demasiado criadero potencial y criadero activo. A bishita un total di 500 cas caba den e accion cu ta den su di cuater siman, den cual a detecta, trata y controla 10 mil (10,000) criadero potencial. Pa loke ta trata criaderonan activo, Croes a splica cu den e prome siman a haya mas of menos 50 criadero, pero den e siguiente simannan ya e cantidad ta creciendo na 70 pa 80 criadero pa siman.
E colaboracion entre GKMB, Serlimar y DOW ta dunando frutonan positivo, Clayton Croes a agrega. E cifranan di criadero ta hopi halto, particularmente den e circunstancianan actual, unda cu e tempo ta hopi seco y tin masha poco awasero.
E proyecto di SWIPE en general ta bayendo bon y ta logrando pa bishita mas cas posibel y trata mas criadero activo y criadero potencial posibel. Tin mas of menos cuater siman mas pa completa e accion di “swipe” Aruba di punta pa punta y ta logrando e meta, cual ta pa limita e oportunidadnan pa Dengue, Chikungunya y Zika plama.
Entretanto Departamento di Salud Publico su diferente seccionnan ta reenforsando e supervision di casonan pa detecta e prome incidencia , si acaso tin , Guillan Barre Syndrome, Fisher-Syndrome, Encephalitis, Meningitis, Meningo-encephalitis y Microcefalie. Tin extra vigilancia pa cu hende muhenan na estado den tur trimester di embaraso y ta pidi pa e partnernan di hende muhenan na estado no tin relacion sexual of si tin relacion sexual cu e muhe na estado pa nan uza condom. E transmision sexual di Zika no ta confirma cientificamente ainda, pero e sospecho ta existi , esaki segun reciente publicacion internacional.
New England Journal of Medicine a publica cu den cualkier trimester di embaraso ta asocia Zika cu microcefalie, morto di e baby durante di embaraso, insuficiencia di placenta, restriccion den crecemento di e baby den embaraso y CNS injury, esta daño na e sistema nervioso.
Den e prome ocho simannan di 2016, esta te cu dia 5 di maart, Aruba a conoce 16 caso confirma di dengue, 2 caso confirma di chikungunya y 17 caso confirma di Zika. Ta esencial pa henter comunidad ta consciente di e consecuencianan potencial di Zika, un virus cu den mayoria caso tin sintomanan hopi leve, pero por tin consecuencianan cu ta hopi grave.
