Departamento di Salud Publico (DVG) ta anuncia cu su Seccion Cuido Salud Hubenil (JGZ) lo cuminsa cu nan campaña di vacunacion escolar cu habitualmente ta tuma luga na inicio di aña escolar. Aunke un 95% di nos poblacion ta vacuna contra diferente malesa cu ta un indice grandi; ainda un 5% di nos poblacion no ta vacuna pa diferente motibo.

PR di DVG, Jurette Croes a declara cu na Aruba semper ta rekeri e autorisacion di e mayornan pa vacuna nan yiu, ya cu vacunacion no ta obligatorio. P’esey Croes hunto cu e micro biologo, Dr. Wilmer Salazar na servicio di DVG ta haci un yamada na tur mayor pa bira consciente riba e proteccion cu e vacuna ta brinda na nan yiunan riba cierto malesa cu lo por resulta te hasta mortal.

JGZ tin data base amplio di tur mucha cu a haya vacuna. E registracion aki ta data di mas cu 20 aña pasa. Pero tambe tin registracion mas bieu riba ficha of documentonan. Sinembargo, un yamada na tur mucha cu no a haya vacuna, y cu a bin di otro pais, ta wordo pidi pa nan trece nan certificado di vacunacion di exterior. Asina nan por sa precies si e mucha a cumpli cu nan programa di vacunacion debidamente.

E biaha aki e grupo mas grandi cu ta wordo vacuna ta di 6 klas cu ta haya nan vacuna di 10 aña. E mucha muhe ta haya e vacuna HPV (Virus Papiloma Humano.) Croes ta reitera cu na Aruba no tin un sistema di vacunacion obligatorio. P’esey tur mucha cu ainda ta pendiente di haya su vacuna -segun nan programa di vacunacion- lo haya un carta caminda e mayor mester duna autorisacion na JGZ pa vacuna e muchanan na scol. Unabes cu e mucha ta completamente vacuna pa su edad, e ta haya e prueba di vacunacion pa e mayor por warda esaki.

Proteccion

Aunke e indice di persona vacuna ta hopi halto, ainda tin un grupo chikito di 5% cu no ta vacuna y cu ta vulnerabel na diferente malesa, entre nan sarampi cu ultimo tempo a presenta na Europa, Merca y otro pais di nos region. Na Aruba no a presenta caso di sarampi recientemente, pero si algun casonan sospechoso.

Dr. Salazar a remarca cu ta importante pa e muchanan por haya nan refuerso di vacuna pa medio di e dos dosis pa haya un proteccion largo y duradero. Di e forma aki e muchanan por bira immuun na tur e malesanan cu por wordo preveni cu e vacunanan. Aunke vacuna no ta obligatorio na Aruba, e ta haci un apelacion pa tur mayor bira consciente. Ya cu si eventualmente un caso por ehempel di sarampi ta wordo presenta, e ta haya cu un caso so ta demasiado.

“No mester tin casonan di e tipo di malesanan cu ta prevenibel,” el a bisa. E ta haya cu si nos por vacuna un 100% di nos poblacion infantil, e ta un garantia cu no lo tin problema cu por afecta nos salud publico. Esaki independiente cu hendenan di afo por bin cu e malesanan, pero nos hendenan lo ta proteha caba.

Con importante ta pa bin cu un ley caminda vacuna ta obligatorio? Dr. Salazar ta haya cu esaki ta depende di e maneho di cada gobierno como pais autonomo. Apesar cu e vacunacion no ta obligatorio na Aruba, DVG semper ta monitor rond di nos region y otro parti di mundo. Si tur nos poblacion ta vacuna ta algo positivo. Pero cada un di nos tin su punto di bista rond di e vacuna. Por ta cu den futuro eventualmente Organisacion Mundial di Salud (WHO), pero organisacion na Hulanda ta dicidi pa implementa cierto vacuna obligatorio pa atende cierto problema di salud publico a base di loke nan a monitor.

Ta e caso di keintura geel cu a bira un vacuna obligatorio pa cierto paisnan. Na Aruba e vacuna aki ta obligatorio tambe si hende ta bishita paisnan manera Brasil, Peru y otro region di Sur America. Y e hendenan cu a bin di e paisnan aki ta obligatorio pa nan presenta nan carchi gel di vacunacion contra keintura geel, prome cu nan yega Aruba.

Tin mayor cu ta opta pa no vacuna nan yiu debi na informacion divulga den social media y medionan di informacion cu e vacuna ta causa mas problema cu beneficio. Riba e tipo di pensamento aki, Dr. Salazar ta bisa rotundamente cu: “No ta berdad.” E ta haya cu mas problema ta causa e virus y bacteria y e malesanan infeccioso mes. Te hasta nan por plama treciendo hopi complicacion den nos comunidad.

E no ta nenga cu den cierto caso e por causa dolor un tiki so, y tin biaha keintura cu ta un reaccion natural di e curpa mes. Pero te ainda nan no a confronta niun caso severo pa efecto di e vacunanan na Aruba.