Mientras cu gobierno a dicidi cu e luna aki nan no lo sigui mas den incertidumbre, y nan a manda un carta na Citgo pa convoca un reunion pa defini nan compromiso cu e refineria. Di su banda sindicato IOWUA (Independent Oil Workers Union of Aruba), cu ta representa e trahadonan di e refineria a pidi un reunion cu gerencia di Citgo, y nan a trata recientemente diferente puntonan cu nan ta considera importante. Entre otro nan a haya aclaracion riba e situacion di e trahadonan cu ainda ta labora den e refineria.

Presidente di IOWUA, Boy Anthony a declara na Bon Dia Aruba, cu dos siman pasa nan a sinta cu e director nobo di Citgo Aruba, Luis Marquez y Madelene Medina cu ta na cabes di e compania. IOWUA a pidi e reunion aki, manera nan contracto colectivo (CAO) ta stipula, esta cu un biaha pa luna nan mester reuni. E reunionnan mester informa kico ta tumando luga y kico ta pasando cu e refineria. Den e ultimo reunion cu nan a sostene recientemente loke a sali ta cu Citgo ta sigui cu e fasenan pa rehabilita e refineria. Tambe nan a papia riba e situacion di embargo cu Conoco Phillips tin riba Citgo.

Un punto cardinal pa IOWUA tabatin di haber cu stabilidad di e trahadonan y di nan miembronan. Despues di e reunion aki, IOWUA a haya un aire di trankilidad, ya cu actualmente – y nan ta sigur di esey -, niun trahado lo wordo kita. Awor e refineria ta den fase 2, pero unabes cu nan bay fase 3, lo tin mas actividad den e refineria, pasobra esaki lo pidi pa mas trahado den servicio.

P’esey, sindicalista Anthony ta reacciona riba un declaracion di San Nicolas Business Association (SNBA), caminda nan ta bisa cu e refineria no ta haci nada pa Aruba, y San Nicolas no ta bay dilanti. E ta haya cu esaki no ta full berdad. Di su banda e sindicalista ta mantene su mes optimista y positivo. E ta haya cu si Citgo Aruba ta tuma 500 trahado mes na San Nicolas pa medio di contratistanan, sigur esaki lo trece un cambio pa San Nicolas. “Nunca den bo bida bo no por bisami cu esey no ta haci un cambio, pasobra e ta haci un cambio.” Segun e sindicalista tin dos actitud rond di e rehabilitacion di e refineria. Bo por ta positivo of negativo.

Fase dos
Sindicalista Anthony a defini fase como ‘cada biaha mi ta bay un tiki dilanti’. E echo cu a wordo kita cierto ehecutivo fei Citgo Aruba, esaki ta ocasiona cu nan por haya den detaye cierto desaroyo. Pero el a laga sa cu ta dificil como sindicato pa nan exigi cierto detaye cu tin di haber cu maneho mes. Sinembargo loke nan a haya sa cu nan ta sigui cu e fase 2. Nan ta sigui inspecciona e tubonan cu ta un trabou grandi y cu ta demanda hopi cuidao.

E refineria ta uno cu ta data fei decada di 1920 y nan tin instalacion bieu. E sindicalista a bisa cu e fase aki ta un prioridad cu gerencia di Citgo Aruba a informa nan cu lo sigui pa inspecciona e tubonan. E fase aki por dura 8 luna, pero ainda e termino di e fase aki no ta conoci. Ya cu aunke nan ta sigui inspecciona, Valero a laga hopi informacion valioso, pero riba e tubonan si no tin mucho informacion, pa ehempel con diki nan ta y nan periodo di bida. Pa averigua esaki nan ta aplicando un tecnologia nobo cu Citgo Aruba ta importa fei Merca.

Trahadonan y gas
Aworaki tin alrededor di 60 trahado di e refineria y afilia na IOWUA. Mientras cu e trabou di e refineria ta bay slow, den e terminal nan ta activo y nan no por cera.

Esaki ta e terminal cu ta abastece nos pais di combustibel. Entre otro nan ta suministra combustibel pa e compania di utilidad WEB por produci awa y coriente. Unabes cu e fase 2 ta culmina, lo bin cu e siguiente fase cu ta demanda mas trahado tanto local como di afo.

Pa loke ta e embargo, e splicacion cu IOWUA a haya ta cu Conoco Phillips ta haci negoshi na Merca, pero e situacion aki no ta afecta Citgo Aruba, pero si PDVSA debi na e problema interno socio-politico na Venezuela. Tambe IOWUA a haya mas informacion pa loke ta e proyecto ambicioso di gas for di Venezuela pa Aruba cu lo crea menos polucion pa nos isla na momento cu e refineria start. Fei sr. Marquez nan a haya sa cu tin 5 compania interesa. E sindicalista ta haya cu esaki ta algo cu gobierno mester mantene, pasobra unabes cu nos tin gas tur e problema di polucion entre otro na WEB lo por baha. Actualmente e problema aki a wordo resolvi –manera gobierno a informa- cu un solucion practico di importa combustibel di miho calidad, pero mas caro.

Tur e puntonan aki IOWUA a trata nan cu gerencia nobo di Citgo Aruba. E dirigente sindical a bisa cu den caso di cualkier aclaracion, si nan lo mester un reunion mas, nan lo pidi’e.