Te ainda no tin caso oficial di intoxicacion pa motibo di pisca contamina

y Parke Arikok e derame di azeta no ta wordo categorisa como crisis mas, su efecto riba nos bida marino si ta keda un preocupacion. E preocupacion aki tin di haber particularmente cu un eventual consumo di pisca contamina pa consecuencia di e derame di azeta aki. Hefe di departamento di Higiena y Inspeccion di Alimento,Yvette Geerman a declara na Bon Dia Aruba cu te awor no a wordo raporta niun incidente cu tin di haber cu contaminacion di pisca pa consecuencia di e derame di azeta aki. Ademas ultimo tempo no a drenta niun caso na salubridad publico riba caso di contaminacion di alimento. Logicamente – segun Sra. Geerman – e caso di derame di azeta y su impacto tambe a hala atencion di nan como salubridad publico. Sinembargo tin otro departamentonan encarga cu e asunto aki directamente manera Directie Natuur en Milieu; Veterinaire Dienst cu tambe ta controla e calidad di e piscanan . DOW, Departamento di Santa Rosa y Rampenbureau tambe ta envolvi den esaki.

Control awa di lama
Locual departamento di Higiena y Inspeccion di Alimento ta envolvi cu ne ta e investigacion riba calidad di e awa di lama, segun Sra. Geerman. E parti di e calidad di e pisca, tambe tin atencion di nan, “pero nos no sa e gravedad ainda”. Nan mester warda e resultado di e pruebanan di e awanan di lama. Nan a tuma algun muestra en e areanan mas afecta pa e derame di azeta pero ainda nan no por bisa con hopi e ta afectando e piscanan. “Esey nos no por bisa ainda!”, e directora a declara riba pregunta di Bon Dia Aruba. Nan ta sperando resultado ya cu full un team completo ta trahando riba e derame di azeta aki. E directora ta splica cu nan a haya si pisca morto pero Veterinaire Dienst ta esun encarga cu e cifranan. Segun Sra. Geerman, logicamente mester evita di come e tipo di pisca aki y tuma tur precausion posibel. Riba e parti toxico mester manda haci un analisis afo, ya cu na Aruba mes e tipo di analisis aki no ta posibel. Nos no tin laboratorio specialisa of sofistica cu por haci analisis di e tipo aki. E departamento ta spera cu den termino corto e resultado di e analisis di awa di lama lo por drenta for di Merca.

Negligencia
Sra. Geerman no ta descarta cu tin momentonan cu tin cierto negligencia entre otro di e esunnan cu ta bira malo; cu ta considera e intoxicacion aki como un simpel diarea relaciona un algo otro, ya sea un andansa of griep, etc. “Esaki ta mi pensamento. Pasobra entre nos mes no ta drentando cu cierto frecuencia e parti di intoxicacion cu cuminda”, el a bisa. E ta contento cu di otro banda nan no a haya niun caso grandi ultimo tempo. Generalmente ora cu un caso grandi di intoxicacion cu cuminda ta drenta cerca departamento di Higiena y Inspeccion di Alimento ta via melding cu ta drenta for di hospital; y otro nan cu ta yega cerca nan tambe. Nan cifranan di e kehonan cu ta drentando cerca di intoxicacion pa cuminda contamina of den mal estado ta hopi abou. Un par di aña pasa a tuma luga un caso grandi di intoxicacion cu cuminda di lama relaciona cu un establecimento na Savaneta, sinembargo e departamento aki no a haya mas caso di e caliber aki. Tabatin casonan si cu a tuma luga pero no di e mesun magnitud aki, Sra. Geerman a laga sa. E directora no ta descarta cu no tin nada ta sosodiendo pero por ta esun cu ta bira malo mes, no ta kere cu ta un problema di intoxicacion cu cuminda e ta.