Pa minister presidente, Evelyn Wever-Croes ainda ta mucho prematuro pa Aruba habri su frontera, despues cu gobierno a decreta e lockdown pa turista dia 16 di april.
P’esey e noticia cu a wordo divulga cu gerencia di aeropuerto a informa cu entrante 1 di juni lo re inicia su operacion tabata un sorpresa p’e.
Contestando pregunta di Bon Dia Aruba, e prome mandatario a declara cu nan tambe a tuma nota di e anuncio aki. “E no ta un anuncio cu a sali coordina,” el a bisa. No ta asina -segun prome minister- cu aeropuerto por habri dia 1 di juni.
El a afirma cu Aruba ta den un crisis y tur loke tin di haci cu e crisis aki, mester wordo coordina cu e team di maneho pa atende cu e coronavirus/Covid-19. E ta e persona responsabel como prome mandatario di pais Aruba pa guia e team aki, y nan ta trahando riba tur posibel escenario pa yega berdad na e momento cu nan por anuncia cu nos aeropuerto ta keda habri bek.
Sinembargo el a declara cu na e momento aki, nan no ta mira e posibilidad cerca cu e apertura di nos aeropuerto lo sucede dia entrante 1 di juni. Premier Wever-Croes a laga sa cu e no ta exclui e posibilidad aki tampoco, pero te ainda no ta e momento pa bisa esey.
Den varios declaracion el a yega di expresa hunto cu minister di Salubridad Publico cu nan lo flexibilisa e medidanan cu a wordo adopta y asina cierto actividad cu na su momento no a wordo considera esencial durante e shelter in place, por reanuda nan operacion.
Pero esaki ta sucede gradualmente y baho cierto protocol di bio-siguridad pa evita cu e casonan di Covid-19 cu a cuminsa baha considerablemente lo por aumenta bek. E ta haya cu relaciona cu e caso di aeropuerto su re inicio di operacion, nan lo mester evalua bon prome pa evita casonan importa di coronavirus. Na luna di mei, nan lo laga sa nan decision pa aeropuerto por habri bek y bao cual protocol.
