E anuncio cu fraccion di MEP a haci cu otro luna e ministernan mester presenta pa duna cara na parlamento riba nan maneho y gasto financiero, no ta nada nobo pa oposicion. Segun lider di fraccion di AVP, Marlon Sneek, ya caba esaki tabata regla den ley fei gobierno anterior.
Es mas, e ta mira cu e gobierno actual no ta cumpliendo cu e ley aki, caminda cada cuater luna nan mester presenta un kwartaal rapport na parlamento. Pero tampoco e ta yega cu gobierno ta cumpliendo cu e kwartaal rapport na e colegio di supervision CAft. E organo aki ta esun cu mester duna un advies, pero CAft no a reacciona tampoco. E ta haya cu fraccion di MEP kier mustra cu e kwartaal rapport aki ta e ekivalente di e reunion publico cu nan kier bin na augustus cun’e.
E ta reacciona bisando cu awor fraccion di MEP -como parti di e gobierno di coalicion- nan kier pretende cu nan a bin cu un amienda pa bin cu mas control riba gobierno. Nan kier mustra como si nunca esaki a yega di pasa. “Shonnan e cos aki nos a buta den ley. Gobierno mester manda un kwartaal reportahe, y basa riba kwartaal reportahe, bo ta mira exactamente kico tabatin den entrada y kico tabatin na gastonan”, parlamentario Sneek a bisa.
E ta haya cu e lider di fraccion di MEP kier pretende cu nan a inventa cu gobierno lo mester bin duna cuenta dilanti parlamento. Mientras cu esaki tabata existi caba. Sinembargo e ta afirma cu e unico diferencia ta, cu e gobierno aki -den e di shete luna di 2018- ainda no a presenta niun kwartaal reportahe na parlamento. Na altura aki, gobierno mester a presenta dos kwartaal rapport na parlamento, pero esaki no a tuma luga ainda.
Te hasta basa na e kwartaal reportahe, nan tabata yama na reunionnan publico pa controla gobierno riba nan gastonan y nan entradanan si nan a cay atras, segun sr. Sneek. Mientras cu e ta mira cu esaki no ta tumando luga den e gobernacion aki.
E ta haya cu minister di financia ta esun directamente responsabel pa entrega regularmente nan kwartaal rapport na parlamento, pa medio di su departamento di financia. Algo cu tabata pasa sigur, sagradamente, e ultimo tres añanan, segun parlamentario Sneek. Pero e aña aki, bou e constelacion di e gobierno di coalicion (MEP-POR-RED), nan no ta cumpliendo cu esaki.
E parlamentario a bisa, cu den e reunion cu lo bini pa atende e asunto di maneho financiero di gobierno, nan fraccion lo bin cu preguntanan y nan ta entregando nan caba, pa como oposicion nan por sa kico ta e motibo di e falta di cumplimento aki.
