Dialuna ultimo den Parlamento di Aruba a wordo trata e Ley di Screening pa ministernan na unda partido RED y AVP no a sostene e ley aki y cu segun presidente di parlamento Juan Ady Thijzen a sigura pa Bon Dia Aruba, te ainda no ta conoci pa ki dia e reunion aki lo haya un fecha nobo den agenda.

Di esaki, comunidad por scucha na diferente medionan local cu parlamentario di partido RED Ricardo Croes a informa e motibonan di pakico e no por sostene ley aki, el a splica cu ora el a cuminsa cu su campaña el a trece dilanti e tema di cannabis medicinal na unda nan tin den acuerdo di gobernacion cu nan ta bay legalisa cannabis medicinal “y te dia di awe nada di esaki a tuma luga”, manera el a sigura.

Segun Croes a manifesta for di 2018 cu a cuminsa trata e ley aki ta pa tene na cuenta cu e desaroyo di cannabis na nivel internacional “ta remedi” y premirando esaki ta imposibel cu ta bay screen ministernan pa wak si nan ta usa cannabis of no, di esaki, el a expresa cu pa partido RED ta hopi importante pa considera esaki y otro puntonan pa propone cambio pero nan no a haya sosten.

“E ley di awe ta sali for di acuerdo di gobernacion y esey ta berdad, pero e acuerdo ta bisa tambe cu nos ta bay legalisa cannabis medicinal pa nos industria nobo y di esaki nada a bin dilanti”, Croes a señala.

“Si mi kier bira minister, a base di e ley aki lo no por bira minister y esey ta e berdad di e ley aki”, Croes a sigura, asina como tambe el a manifesta cu ora el a puntra cu si nan a tene cuenta cu e punto aki el a haya como contesta cu si, pero ora el a lesa den memorie van toelichting no tabata bisa esey.

“Esaki no ta cosnan di haci ora bo ta den acuerdo cu hende y kier papia di bon gobernacion, respet mester ta mutuo y cumplimento mester ta mutuo, no lo cual ta toca un partido so den coalicion ta considera acuerdo di gobernacion”, Croes a expresa.

Por a compronde for di parlamentario di partido AVP Robert Candelaria cu su partido a inicia e trayecto pa e ley aki pa asina yega na un bon ley di screening di ministernan den pasado, partido MEP a tuma iniciativa pero e no a logra sosten pa motibo cu segun Candelaria a sigura e ley aki no ta cubri tur cos cu decreto actual si ta cubri ora ta screen un minister.

Di mesun manera, el a splica cu AVP a trata di colabora pa yega na un producto di ley cu ta cumpli cu su proposito pa screen ministernan debidamente cu un amienda, entre otro nan ta bisa cu ministernan actual mester wordo gescreen segun stipulacion di ley y di nan amienda, pero loke partido MEP kier ta pa esaki lo tuma luga despues di eleccion di otro aña, tambe e amienda lo a regla decisionnan cu ta impedi belangenverstrengeling pafo di Conseho di Minister cu tambe a wordo rechasa, lagando e posibilidad pa beneficia amigonan y famia.

Di mesun manera, parlamentario di MEP Edgar Vrolijk a duna di conoce riba su rednan social cu no tabata existi ni un motibo valido pa AVP por a vota contra dje. A pone den amienda un articulo nobo pa laga awo di biaha pa screen ministernan mientras cu ya nan a ser gescreen via un Landsbesluit cu ya ta existi y cu Gobernador ta esun cu ta controla e proceso di esaki y cu e LB aki ta e base di e ley nobo aki.

Tambe, Vrolijk a sigura cu “E amienda di AVP tin hopi cambio den e ley y si lo wordo aproba e ta bira parti di e ley y na manera con el a ser presenta hamas por sostene paso e ta stimula corupcion y ta haci e ley uno debi cu gobernador no lo ratifica”.

Bon Dia Aruba tambe a puntra lider di fraccion di partido MEP Rocco Tjon tocante e punto di articulo number 1 cu ta trata di ‘gezinsleden’, pakico a scoge un formulacion tecnico complica y no e formulacion cu pueblonan rond mundo conoce bou nepotismo? Esta: e practica di esunnan na poder pa influencia of faborece famia y amigo, particularmente door di duna nan trabou? Y di mesun manera, con e ley aki lo mester stop e practica aki.

Tjon a duna como contesta cu “e ley aki ta juist tene cuenta cu e parti ey tambe. E ley original ta data di 2015 y ta di fraccion di AVP. Raad van advies a conseha Gobernador pa no ratifica e ley ey pa motibo di 12 punto. Entre nan esun di belangenverstrengeling pa cu famia. Pues e ley aki si ta tene cuenta cu e aspecto ey.

El a lamenta cu e ley no a wordo aproba pa via cu a traves di e ley aki MEP lo a kier contribui na fortifica integridad y bon gobernacion na Aruba

Ta bale la pena destaca cu den gabinete actual di gobierno na e momentonan aki tin famianan y amigonan di ministernan trahando como funcionario publico pa lo cual bon Dia Aruba a investiga e termino ‘Nepotismo’ e cual ta nifica cu “ta trata di haci fabor pa famia of amigo dunando funcionnan of empleo como funcionario publico pa e simpel hecho di tin algun relacion familiar of di amistad, sin tene na cuenta otro meritonan”.