Segun minister presidente Evelyn Wever-Croes (MEP), el a pone gobierno di Hulanda na altura di e situacion financiero cu nan ta confronta cu ne desde e momento cu su gabinete a keda instala oficialmente.

El a bisa cu nan a pidi gobierno Hulandes pa duna su gobierno espacio pa asina nan por bin cu un plan pa atende e problema di finansa publico. Ya caba e minister di Finansa, Xiomara Maduro (MEP) a anuncia ayera mainta cu dificilmente pais Aruba por cumpli cu e regla di College Aruba financieel toezicht (CAft) pa 2017 y tampoco pa 2018.

CAft y Hulanda
Mirando e compromiso aki dilanti di e colegio di supervision financiero, esta CAft, premier Wever-Croes ta haya cu ta un compromiso pa hunto por yega na cierto areglo cu ta aceptabel pa henter comunidad di Aruba. El a agrega cu e rol di CAft ta di un instituto di supervision di finansa publico di pais Aruba. “Nan ta wak con e ta bayendo y nan ta ranca den bel di alarma.” Cada bel di alarma ta indica con gobierno su maneho pa sanea finansa publico ta bayendo ya sea mucho lihe of poco poco. El a bisa cu su gobierno ya caba a haya dos carta di e CAft caminda e instituto aki ta duna dos siman di tempo pa “ahusta e rumbo.”

E mandatario a indica cu su gobierno ya caba a papia cu CAft pa splica nan cu no tin un manera pa ahusta niun sorto di rumbo pa cay bek manera e gobierno anterior a mara pais Aruba cu e ley Landsverordening Aruba financieel toezicht.

E por bisa cu e combersacion cu e instituto aki ta bayendo constructivo pero e tin cu remarca cu ora e ta papia un situacion serio di finansa publico, ta pasobra nos ta violando e ley aki. Nan no kier drenta gobierno pa cuminsa viola ley y pa tal motibo e ta haya cu mester bin cambio pa balansa y asina evita cu nan tin cu viola ley y no bin cu medida contra pueblo. Pero si necesariamente nan mester bin cu un plan pa con por yega bek riba e curso di nos saneamento di finansa publico.

Tambe e prome mandatario ta spera cu e siman aki el por sostene un combersacion cu minister Rutte riba e situacion di crisis financiero di pais Aruba. E kier confirma cu e mandatario aki si Hulanda ta duna e espacio cu e gobierno di Aruba mester pa atende inmediatamente cu e crisis di finansa publico. Te ainda e por bisa cu e posicion di Hulanda ta uno di cooperacion y di duna e gobierno nobo di Aruba su espacio pa por yega na un finansa ‘publico saludabel’.

E ta kere cu te ainda no a yega na e punto cu Hulanda pa bisa cu nan tambe ta coresponsabel di e situacion di finansa publico cu nos pais ta pasando aden. Sra. Wever-Croes a laga sa cu nan kier un finansa publico sostenibel y duradero, ya cu su gobierno kier soluciona e problema financiero di pais Aruba.

Igualmente el a laga sa cu nan no kier soluciona e problema aki cu un serie di medida pa pueblo, y Hulanda ta na haltura di nan posicion. Nan kier solucione di un forma cu como pais nos por bisa kico nos por carga. Segun e mandatario e reto financiero ta enorme. E ta encera 100 miyon florin adicional pa e presupuesto di 2017, cu mester wak con ta resolve den menos cu 4 siman di loke ta resta di e aña aki.

Pues e ta haya cu ni sikiera pais cu mas placa y poderoso no por soluciona inmediatamente algo asina. Mientras cu pa otro aña enbes cu nos tin un surplus den presupuesto nacional, ta wordo premira un deficit di 200 miyon florin. E ta spera cu despues di sostene su combersacion cu premier Rutte, nan por yega na un solucion ‘sin mester di bati na porta di pueblo’.

Aruba no por cumpli cu reglanan di CAft si no bin areglonan nobo
Segun sra. Maduro, aworaki Aruba no por cumpli cu e normanan di CAft pa aña 2017 y tampoco pa locual ta 2018. E mandatario a describi un situacion di finansa publico preocupante cu ‘no ta un realidad pa bay haci wega cu ne’, ya cu si tin algo cu ta bay malo pa nos pais, e ta bay malo pa nos tur. El a bisa cu e gabinete actual ta para pa tuma decisionnan importante pa e pais. “Decisionnan cu kisas no ta facil”. Pero el a prefera di abstene di no bay mas amplio ainda riba ki paso lo bini pa atende e asunto aki.

Actualmente un panorama ta cu mester crea mas debe pa atende inmediatamente cu e situacion dificil di deficit presupuestario aki. El a anuncia tin un ley apart cu ta yega parlamento den e dianan proximo riba e financiamento cu ta bay tin mester pa atende cu e deficit.

Tin debenan di pais Aruba cu na comienso di aña mester wordo trata. Di e manera aki Aruba por busca financiamento pa e debe cu tin mester wordo paga. E suma aki ta core alrededor di 338 miyon florin. E debe aki lo facilita pais Aruba e fondo necesario pa cubri e debenan sin cu ainda e presupuesto di 2018 ta keda pasa den parlamento. El a bisa cu e presupuesto 2018 mester wordo adapta na e carteranan nobo di e gabinete Wever-Croes.

Analisis financiero
Nan a haci un analisis di e situacion financiero cu nan a hereda fei gobierno anterior. Aunke e gobierno anterior a entrega un presupuesto supletorio cu ta mustra un deficit di cero porciento, sinembargo a base di nan analisis cu diferente instancia, esaki no ta cuadra cu realidad.

Segun e mandatario di finansa, pais Aruba tin un deficit extra di 130 miyon florin pa 2017. Aunke e ta kere cu e ta mas bien alrededor di 155 miyon florin na deficit. Esaki considerando cu segun regla di CAft e aña aki nos deficit mester ta alrededor di 25 miyon florin.

Entradanan cu no a drenta
El a splica cu e cifra aki tin di haber cu entradanan cu a keda atras entre nan 50 miyon di winst belasting y 7 miyon di invoerrechten cu gobierno ta keda sin haya nan. Tambe e situacion di e refineria cu mester aporta na caha di gobierno for di RdA, pero nada cu a drenta. Ya caba e gobierno actual a papia cu banco riba e situacion aki pero tur cos ta mustra cu ‘pais Aruba no ta bay haya e placa akinan’.

Pues segun e mandatario esaki ta nifica un buraco extra di 73 miyon florin. Igualmente el a laga sa cu e situacion actual di Citgo no ta duna pa atende e buraco aki. “E situacion aki no ta mustra diferente na loke CAft a bin trece dilanti”, el a bisa.

E panorama ta haci cu nan mester bin cu cambionan riba e presupuesto supletorio cu a drenta parlamento. Nan ta bin cu nota di cambio pa atende cu e realidad financiero di nos pais. Aunke e presupuesto 2018 no a wordo entrega -segun ley ta stipula- e panorama no ta mucho alentado tampoco. A base di nan analisis e presupuesto di 2018 ta conta cu un buraco di alrededor di 195 miyon florin.

E situacion manera cu e ta actualmente, pais Aruba ta bay core e riesgo di wordo downgraded, cu e posibilidad di haya fiansa pero na interes mucho mas halto. Na e momento aki nos ta pagando mas cu 210 miyon florin riba nos debe nacional.