Faltando apenas dos dia pa e reunion di conseho di minister di Reino, ainda gobierno no a tuma un decision final si lo firma e acuerdo cu Hulanda pa e di tres trance di ayudo financiero.

Dialuna anochi durante e conferencia di e crisis team di Covid, Prome Minister Evelyn Wever-Croes a probecha pa referi na e asunto aki. E mandatario no a bisa mucho cos adicional di loke ultimo dianan el a divulga na comunidad. Esta cu gobierno ta sigui den e mesa di negociacion cu Hulanda. El a pidi henter comunidad pa duna nan espacio pa hacie, ya cu tin hopi antagonismo riba e tema aki. El a trece palabra di trankilidad cu ainda gobierno tin espacio financiero pa sigui negocia.

Aunke a bin cu un reapertura gradual di nos economia, gobierno nan gastonan ainda ta mas grandi cu nan entrada, cu a bay substancialmente atras debi na e Covid crisis. Sinembargo prome minister a pidi pasenshi di nos comunidad. Ainda nan ta den mesa ainda negociando cu Hulanda. Nan ta hayando algun cambio cu Hulanda a propone. E no a referi riba ki sorto di cambio nan ta, pero nan ta sigui papia ainda den e siguiente dianan. Pues esaki ta eventualmente un indicacion cu ainda gobierno su rosea financiero no a caba. “Nos tin espacio ainda,” el a bisa.

El a haci un apelacion na henter comunidad pa nos keda trankil. “Duna gobierno espacio pa por negocia e miho deal cu ta posibel. E miho condicion cu ta posibel pa Aruba,” el a declara.

E mandatario a mustra cu no por tuma un decision pura, ya cu como gobierno nan no por pensa riba awo so. Kiermen acepta un acuerdo, sin sa kico lo bay ta e consecuencianan pa mañan. Tin algun condicion cu Hulanda a pone, caminda e ta sigur cu pais Aruba no por cumpli cu nan riba termino hopi cortico. P’esey e ta pidi tempo pa caba di splica Hulanda nos situacion, y purba di convence nan cu e condicionnan ey no por keda ariba mesa.

Mas personal

Tin medidanan poni den e landspakket cu Aruba no por cumpli cu nan den termino corto. Y si nos ta keda sin cumpli nan, eventualmente Hulanda lo bin despues cu medidanan mas pisa pa sigui otorga ayudo financiero. Un di e condicion cu ta sona raro ta esun cu gobierno mester pone entre 100 pa 200 hende extra traha den aparato gubernamental. Mientras cu antes Hulanda, pa medio di conseho di CAft, a exigi gobierno pa baha su gasto riba personal di gobierno, ya cu e ta mucho pisa riba nos presupuesto.

E ta reconoce cu aunke nan ta negocia, e negociacion aki ta complica, y nan ta purba di haya un balans den e negociacion y condicionnan den percura e bienestar di nos comunidad. Den esaki ainda nan tin espacio financiero pa yega na e miho pakete di condicion cu ta posibel. Mientras tin sector di nos comunidad cu ta insisti pa firma awor.

P’esey el a uza un frase yamativo: “Ban no romantisa e deal aki cu Hulanda.” El menciona cu ta e mesun Hulanda esun cu a exigi pa corta den cuido medico 5 miyon florin pa luna memey di un crisis di salud. Mientras cu Corsou ni St. Maarten no mester corta riba cuido medico. Te hasta Hulanda mes no ta corta riba e tereno aki, mas bien lo paga mas placa na e trahadonan di salud.

Tampoco no mester kere –segun e mandatario – cu unabes gobierno firma tur problema di pais Aruba ta wordo soluciona. Esey no ta e caso, segun e prome mandatario. El adverti cu den momento cu pais Aruba firma ta hopi condicionnan cu ta bay hopi leu, ta wordo aplica na Aruba.