Te ainda Citgo di su banda no a duna niun comentario riba e anuncio di gobierno di Aruba cu tin un deal di lease e refineria na San Nicolas.
Momento cu nos gobierno a anuncia esaki riba 13 di mei, Bon Dia a cuminsa busca confirmacion di e compania di petroleo na Merca mes. Nos a puntra entre otro riba e relato di prensa cu gobierno a saca e dia ey como ‘joint press release’, si esaki realmente tin e aprobacion di Citgo. Tambe a puntra e vocero di Citgo si e compania por confirma e fecha di habrimento di e refineria (1 di augustus), e periodo di lease, y tambe ki momento nan ta spera di firma e contract cu gobierno di Aruba.
Ora Argus Media a saca e noticia (17 mei) cu den Citgo tin un desacuerdo riba e deal cu Aruba , entre otro pa motibo di e situacion financiero precario di e compania, Bon Dia tambe a puntra un reaccion oficial di Citgo. Pero nada.
Mas cu 3 siman a pasa awor, pero ainda e vocero di Citgo, esta Fernando Garay, ta indica cu e no a haya e informacion necesario pa por contesta Bon Dia. Pues te awor e ni a confirma e contenido di e ‘joint press release’ cu gobierno a saca 13 di mei.
Den prensa internacional tampoco por lesa niun comentario te awor di banda di Citgo. E noticianan ta basa riba solamente riba e noticia cu gobierno d Aruba a suministra.
Awe, Bon Dia a puntra Richard Arends encarga cu e negociacion pa gobierno di Aruba, con leu e proceso ta. E ta bisa cu e ta spera di duna mas claridad riba e firmamento ‘den e proximo dianan’. Ora e documentonan ta firma, tin cierto leynan ainda cu mester pasa parlamento. Entre otro pa formalisa e companianan estatal cu lo opera e refineria como cu gobierno lo bira e doño di e refineria.
