Cu un investigacion cu a cuminza na aña 2019, Landsrecherche bao guia di hues-comisario den cooperacion cu Cuerpo Policial di Aruba y RST (Recherche Samenwerkingsteam), a haci entradanan hudicial na diferente adres pa loke ta trata un investigacion di Landsrecherche di delitonan di corupcion posiblemente cometi rond di entrega di terenonan di gobierno entre 2009 y 2017.
E investigacion aki a bira conoci como e famoso ‘Caso Avestruz’ na unda durante e diferente entradanan hudicial a confisca documentonan administrativo y material cu diferente tipo di dato, den esaki tambe ta investiga e posibel rol di parlamentario y ex-minister di partido AVP Oslin Benito Sevinger conoci como ‘Benny’ Sevinger cu ta dirigi riba e pregunta si companianan a haya derecho di erfpacht riba base incorecto.
Na luna di october 2019, Ministerio Publico y otro autoridadnan a haci e prome entrada hudicial na cas di Sevinger bao guia di hues-comisario na unda segun e ‘Beschikking Huiszoeking’ cu Bon Dia Aruba a haya ta poni cu ta sospecha cu Sevinger a haci su mes culpabel di falsificacion di documento cu ta cay bao di articulo 2:184 di Codigo Penal di Aruba, estafa segun articulo 2:305 di Codigo Penal di Aruba, aceptacion di soborno bao articulo 2:350/2:351 di Codigo Penal di Aruba, mal uso di su funcion cu ta cay bou articulo 2:354 di Codigo Penal di Aruba y labamento di placa cu intencion/custumber cu ta cay bou articulo 2:404/2:405 di Codigo Penal di Aruba. Despues di varios luna, na januari di 2021 e di dos entrada hudicial na cas di Sevinger a tuma lugar, y segun declaracion di e politico el a bisa cu segun e ta trata di persecucion politico.
E caso di Avestruz a cuminsa haya forma den e dianan aki na unda algun detencion di otro sospechosonan a tuma lugar pa loke ta trata posibel delitonan di corupcion y otro hechonan castigabel cu tin relacion cu otorgamento di tereno di gobierno, unda e sospechosonan di inicial R.R, y P.F ta deteni y bou investigacion na e momentonan aki. Tambe, a bira conoci un otro detencion di un persona cu inicial M.A mihor conoci como (Leoncita) den e investigacion aki.
Siman pasa, partido AVP su lider Mike Eman hunto cu Sevinger a tene un conferencia di prensa pa informa comunidad tocante dos carta cu e ex-mandatario a mustra; un di e cartanan ta di su abogado cu a dirigi su mes na Ministerio Publico encuanto su representacion di e politico sospechoso y cu tambe e ta dispuesto for di comienzo di investigacion pa duna su declaracion como voluntario.
Den e carta tambe a pone cu 17 luna a pasa desde cu el a wordo informa cu e ta un sospechoso, ademas a bisa cu e ta un politico y cu aki seis luna lo tin eleccion. Ta importante pa destaca cu e carta aki a wordo manda pa Ministerio Publico prome cu Gabinete Wever-Croes a entrega su retiro, cu consecuencia cambio di fecha di eleccion.
Su abogado a menciona cu esakinan ta circunstancianan hopi special y como tal su cliente tin derecho y interes pa cu sea awor of mas liher posibel su cliente ta haya su citacion of para cualkier investigacion penal contra su persona, por lo tanto, a puntra pa fiscal no tarda mas cu dia 25 di maart di 2021 pa informa kico ta e decision di Ministerio Publico.
Di otro banda, Ministerio Publico den un otro carta a contesta abogado di e ex-mandatario y a señala cu e ta keda un sospechoso pa caso Avestruz te ora cu lo tuma un decision si lo persigui Sevinger penalmente. Lider di partido AVP Mike Eman a acusa Ministerio Publico publicamente cu “e ultimo añanan decisionnan cu ta wordo tuma na nivel di husticia ta purba di influencia y interumpi e proceso electoral”, den e conferencia di prensa di partido AVP algun dia pasa.
Na luna di maart di aña 2017, Mike Eman den su funcion como promer minister di pais Aruba a duna un declaracion conhunto cu Paul Croes cu tabata minister di Asuntonan Social y Labor y cu tabata sospechoso na e momento ey den e ‘Caso IBIS’ cu tin di haci cu otorgamento di conseho laboral pa permiso di estadia (ontheffing). Den su declaracion Eman a menciona cu Croes “a acerca conseho di minister cu e peticion pa ta ausente y pa duna espacio na un proceso cu semper ta importante den un pais caminda e orden legal y estado di derecho ta para central pa bo por duna for di gobierno un espacio di separacion di poder, tur espacio cu e mester”.
Ex-minister Paul Croes a wordo condena pa Corte di Prome Instancia pa comete seis diferente delito: comete den conhunto (delito di) pidi y acepta soborno, abuso di su funcion, comete den conhunto sustraccion (verduistering), comete den conhunto labamento di placa regularmente, comete den conhunto duna empleo ilegal y participacion na un organisacion criminal cu un castigo di cuatro aña di prizon cu e mesun Ministerio Publico cu Eman a cuestiona algun dia pasa den su conferencia di prensa.
Loke ta remarcabel den e actual asunto (caso Avestruz) ta cu aparentemente e lider di partido no ta midi cu e mesun midi y e mesun Ministerio Publico cu a hiba un minister di su gabinete na un condena di varios aña, awor lo ta culpabel di influencia politico y e ta keda apoya (ainda) su candidato pa proximo eleccion.
