Dos di e artistanan pop mas famoso di mundo ta dunando bek na nan fanaticonan mientras epidemia di coronavirus a laga hopi hende sin trabou y sin salario.
E cantidad di Mericano solicitando bijstand a aumenta na mas di 3.2 miyon siman pasa, y Taylor Swift y Ariana Grande no a ignora e kehonan di nan fanaticonan tocante nan situacion riba rednan social.
Segun People, Swift a haci un donacion di $3mil cada un na sikiera dos fanatico cu a expresa nan preocupacion financiero e siman aki. Un fanatico leal di Swift, Samantha Jacobson, kende a traha como waitress na Florida, a bisa e revista cu el a keda sin trabou na momento cu su sitio di trabou a cera.
Ora Swift a sorprend’e cu e donacion di $3mil, Jacobson a bisa cu el a keda ‘sin palabra’.
“Mi no por a kere cu un persona kende mi a admira, stima y respeta pa asina largo a tuma contacto cu mi cu un generosidad asina”, el a bisa e revista.
Otro fanatico yama India a hala atencion di Swift cu un tweet tocante cancelacion di su trabou pa seis luna pa motibo di novel coronavirus. India a comparti screenshot di su cuenta di su combersacion riba Twitter cu Swift, kende a bisa cu e kier a yuda ‘alivia e peso’ cu un donacion di $3mil.
Mientras tanto, Grande, kende ta comunicando su deseo pa traha musica durante cuarentena, a manda fanaticonan entre $500 y mil, usando e app Venmo, segun fuentenan a bisa Page Six.
Un Arianator a bisa Page Six e cantante a ‘paga mi mi salario pa un luna’.
Page Six a bisa cu Grande a yuda mas di 20 fanatico mientras shutdown ta continua a traves di Merca.
Contribucion di Swift y Grande ta yega poco mas di un siman despues cu e cantantenan a usa nan plataforma publico pa urgi nan fanaticonan keda cas, pa asina ciudadanonan den halto riesgo keda leu di peliger.
