Diahuebs atardi durante conferencia di prensa, IDEA (desaroyo pa empresa Arubano), un unidad di Departamento di Asuntonan Economico, Comercio y Industria, ta organisando un tayer pa pensionado cu ta desea pa sigui uza nan carera y experencia di bida den nan mesun negoshi.

Judella Trim, kende ta policy advisor na DEZHI, hunto cu Louella Croes, tambe un policy advisor na DEZHI, y beleidsmedewerker pa IDEA, a splica tocante e tayer cu lo tuma luga dia 10 te cu 14 di juni, for di 8:15 di mainta te cu 12:30 merdia, na DEZHI Sun Plaza. E participacion ta gratis.

E tema di tayer ta ‘Silver Entrepreneurship Tayer for the retired or soon to be retired’. E tayer ta pa esunnan cu ta bay riba pensioen, of ta riba pensioen pa emprendimento den nan tercer edad, tambe e lo wordo duna na Papiamento.

Durante e tayer lo duna tips y contesta riba algun pregunta cu mayoria di biaha un persona ta puntra su mes ora cu e ta yegando na un edad avansa. Kico e persona ta bay haci, of con e ta sigui. Algun duda den kier habri un negoshi. Si e kier avansa mas den tecnologia y innovacion.

E tayer aki lo wordo presenta door di diferente profesionalnan den diferente ramo. Hunto, e oradornan lo yuda esunnan presente pa ‘brainstorm’ idea y haci nan bira realidad. Dave Martinus, kende ta Certified Business Coach pa Action COACH, lo presenta ‘Kico ta encera entrepreneurship’.

Marc Croes, consehero polisa di planificacion di desaroyo sostenibel (Policy Advisor Sustainable Development Planning) na DEZHI, lo elabora ‘Con pa aplica e tema sostenibilidad den bo negoshi’.

Notaris Johnson lo presenta temanan di: bedrijfsvormen (eenmanszaak/ NV/ VBA), bedrijfsopvolgingen (diferencia den companianan) ora cu bo lo kier cuminsa un negoshi y tambe lo presenta tocante testamenten/nalatenschap (kico por laga atras y pa ken).

DEZHI, afdeling di Vestiging van Bedrijven, lo papia di tur e tipo di vestigingsvergunningen (permisonan pa establece un negoshi) cu tin, y cu bo lo por aplica na e departamento aki y IDEA, lo papia tocante tur nan servicio- y training nan curso cu nan sa ofrece na clientenan.

Benny Richardson lo papia y mustra e importancia pa ta exitoso den bo bida personal, door di biba un bida saludabel (come saludabel y sport). Pa yuda e mentalidad pa por ta un empresario exitoso.

Kenneth Faustin, broker na Best Buy Aruba y un Certified Auctioneer, lo papia tocante oportunidad comercial den ‘Real Estate’; SVB, lo presenta tocante dunado di trabou y trahado y primanan social;

Tamarah Arends-Croes, Business Electronic Sales Specialist na RBC Bank, lo elabora riba nan procedura pa habri un cuenta di banco y e producto/ servicionan innovativo cu RBC ta ofrece;

Futura, lo presenta 2 topico: ‘Future of Work’ y ‘Design Thinking’ e futuro di trabou y pensamento den diseño special pa pensionadonan. Santa Rosa lo comparti informacion riba con bo por haci di agricultura algo comercial.

Cindy Clark, Managing Director di Accura Tax Consultancy, lo elabora tocante impuesto relevante pa un empresario. SETAR, lo papia tocante e importancia di ‘Digital Marketing’ mercadeo digital. Lo duna tips efectivo con pa promove bo negoshi via rednan social, manera Facebook, Instagram, Google Search. Y lo papia tambe tocante Direct Email.

Tambe Louella Croes a splica cu lo tin intercambio di experiencia. Nan a busca facilitadornan pa por papia di nan mesun experiencia como pensionado, y con e ta bayendo. Lo tin Lionel Rumnit, kende ta specialisa como Job Coach na ‘Trampolin pa Trabao’, y lo conta con e ta train e personanan cu discapacidad, pa den futuro por drenta den mercado laboral den nos sociedad. Croes a remarca cu locual Rumnit ta haciendo ta ‘tremendo motivacion pa esunnan presente’.

Rosa Alberto, propietario di Ginger Aruba Rosken, kende a cuminsa su negoshi ora el a drenta su edad di pensioen y ta bende su producto den luga grandi rond Aruba. Loui Richardson, propietario di Invest Secure; con pa continua cu bo negoshi ora bo yega bo edad di pension. Merrill Robles (un pensionado), con e ta yuda comunidad pa medio di un negoshi y pafo di un negoshi.

DEZHI lo sigui cu nan informacion pa enrikece y pa persona prepara nan mes. Pa asina por habri negoshi y drecha nivel. Croes ta conseha si pa esunnan cu participa, pa atende henter e siman. “E ta un combo di henter informacion. E ta tristo pa falta un parti. Pa persona cu kier atende registra pasobra e ta yena lihe.”

https://www.eventbrite.com/e/silver-entrepreneurship-tayer-for-the-retired-or-soon-to-be-retired-tickets-62437630634 of por yama pa mas informacion na IDEA, Judella Trim of Louella Croes na telefon 521-2440/ 521-2439/ 521-2400.