Tayer di restauracion di coral ta fortalece cooperacion entre islanan Caribense

(Bonaire.nu) – For di 31 di maart pa 4 di april 2025, un tayer intensivo tocante restauracion di coral, organisa pa Reef Renewal Bonaire (RRFB) a tuma lugar na Boneiro . E encuentro cu a dura un siman a trece expertonan di restauracion di henter Caribe Hulandes hunto, incluyendo representantenan di Reef Renewal Curacao, Fundacion Conservacion di Saba y Fundacion ScubbleBubbles di Aruba.

Meta di e tayer tabata pa comparti conocemento, mehora tecnicanan di restauracion y promove cooperacion regional riba tereno di restauracion di coral. Participantenan a ricibi presentacion diario y a colabora durante sesionnan di tereno na sitionan di recuperacion activo di RRFB. Durante e sesionnan aki a discuti y aplica varios tecnica, manera micro-fragmentacion di coral, propagacion di coral di candela, fotogrametria y educacion. Participantenan a comparti nan experencianan y lesnan siña for di proyectonan anterior di restauracion riba nan islanan y a explora oportunidadnan nobo pa mehoracion.

Ernst Noyons, Hefe di Operacion di RRFB, a enfatisa e importancia di e colaboracion aki: “Restauracion di coral ta un proceso continuo cu ta evolucionando constantemente. Ta crucial pa nos como region evoluciona tambe. Dor di trece ekiponan di e diferente islanan hunto, nos no solamente ta fortalece conocemento y experencia, pero tambe ta aumenta e capacidad di otro na e retonan di medio ambiente cu nos ta enfrenta.”

E tayer aki ta un paso importante den RRFB su strategia a largo plaso pa fortalece e cooperacion entre e islanan. Dor di agrupa experticio y recursonan, RRFB ta spera di desaroya un acercamento mas coordina pa restauracion di coral cu no solamente por atende menasa local manera bleachmento di coral y malesa, pero tambe haya solucionnan sostenibel pa conservacion di rifnan di Caribe.

Den futuro, RRFB tin como meta pa sigui expande su netwerk pa medio di tayer, intercambio di tereno y iniciativanan di investigacion conhunto. Dor di intensifica cooperacion entre e islanan, RRFB ta spera di por acelera efectividad di proyectonan di restauracion di coral den Caribe y asina tin un impacto mas grandi riba conservacion di rifnan di coral di e region.