Ayera mainta un grupo di taxista a uni y a dicidi di tuma accion pa demostra nan mal contento cu e maneho di minister di Transporte, Comunicacion y Sector Primario, Chris Romero.
Den e accion aki, hopi auto cu ta pertenece na e taxistanan a paralisa e centro di ciudad, na momento cu nan a dicidi di para nan auto dilanti di Berstuurskantoor pa haci entrega di un manifiesto pa Romero.
Linda Orman, vocero di e grupo di taxista aki, a expresa cu nan a haci entrega di e manifiesto aki pa trece algun punto cu segun el a afirma, minister mes sa caba. Nan ta haci pedido pa un moratorio riba taxi T y O.
Den e manifiesto, Orman a bisa cu si ta bay drecha e caos cu tin den e transporte, mester para tur cos y cuminsa pone control, implementa mas regla cu tin den transporte publico.
Den punto dos, el a manifesta cu mester stop di otorga O vergunning debi na competencia cu ta existi y ta causa tur problema cu Romero ta hayando cune.
“Esaki no ta algo cu minister a causa, sino cu ta algo cu bo persona a hereda”, Orman a sigura.
Tambe taxistanan ta pidi Romero pa instala un comision di transporte, pa motibo cu ta hopi importante cu conhuntamente por yega na un solucion cu tur cos regarda cu transporte publico.
Regula tur vergunning segun reglanan di permiso di Ministeriele Beschikking (M.B) pa tur hende ta actualisa di kico nan por y no por haci. Na e momentonan aki ta otorga vergunning y duna permiso pa bay subi caminda. “Esey no mester sucede mas, e persona mester tin tur papel den su man segun ley y mester haya un curso chikito pa siña su reglanan, etc.”
Di loke ta trata boet, pone esaki riba esunnan cu ta viola e regla di nan vergunning, no solamente pa A y O sino cu tambe pa taxi. “Si un hende ta comete algo cu no ta bon, bo tin cu haya bo boet”, Orman a menciona.
Chauffeur di O vergunning tambe mester pasa e mesun rekisito cu otro chauffeurnan, pa motibo cu e tipo di vergunning aki ta hopi mas grandi y tin mas responsabilidad y nan no ta pasando ningun rekisito pa haya esaki. Di mesun manera, Orman a bisa cu control ta hopi esencial.
Orman den nomber di e taxistanan a haci un peticion na Romero pa sinta na mesa y yega na un acuerdo pa traha hunto, trece mas comunicacion cu e grupo di e taxista cu e ta representa y cu segun el a sigura, ta esun mas grandi, pa asina nan por traha miho
Di su banda, Romero a duna su contesta pa e grupo di manifestante aki, den cual el a trece dilanti cu e puntonan den manifiesto tin atencion di Gobierno caba. Tin algun punto cu ta na su luga y nan ta bezig cu esun cu a menciona di O vergunning – cu mester di e mesun rekisito cu e otro.
Di mesun manera, Romero a informa cu control ta tumando luga, pero igualmente ta keda un dificultad, pa motibo cu si tin tanto hotel mas e aeropuerto, e pregunta ta con por aloca asina hopi hende tur caminda y di esaki DTP ta haci lo maximo cu por.
