Taxistanan ta pidi husticia pa nan colega femenino maltrata pa turista

Ayera un grupo di taxista a condena e echo cu un colega di nan a wordo brutalmente maltrata pa un turista Mericano di origen Rusiano.  Nan ta denuncia cu berdaderamente nos ta biba di turismo, pero esaki ta un situacion inaceptabel caminda turista agresivo kier trapa riba nan, ya cu esaki lo por sosode tambe cu cualkier trahado di e sector turistico.

Durante un conferencia di prensa cu a tuma luga den sede di A1 Services Aruba, sr. Omar Barut di taxi 393 den nomber di e taxistanan en general a pidi pa husticia prevalece y tambe el a pidi proteccion specialmente pa nan coleganan femenino.

“Nos a tolera mucho y aworaki nos kier manda e mensahe cla y raspa pa husticia. Ministerio Publico tuma e cos ey den seriedad”, el a bisa.

E taxistanan a pidi unanimamente pa nos autoridad local no laga liber e turista responsabel di e echo aki. Nan a lamenta cu den pasado otro colega femenino di taxi 269 a bira victima di maltrato tambe; y despues cu e turista a paga un boet, nan a lag’e bay. Pa nan esaki no mester sosode mas ya cu e caso di nan colega Greace di taxi 169 kende actualmente ta interna den cuido intensivo na hospital ta inaceptabel. E turista a kibra tres ribchi di dje, tambe su nanishi y lag’e na werki. No ta e prome biaha cu e taxista aki a bira victima di menasa, ya cu prome biaha nan a pone revolver den su cabes.

Sr. Barut a bisa cu e “cobarde” cu a maltrata un hende muhe mester por haya un castigo ehemplar pa loke el a haci cu nan colega femenino.  El a laga sa cu na Merca un caso similar a presenta cu un taxista cu a wordo maltrata pa su cliente. E persona aki a haya 15 aña di prizon pa loke el a haci.  Nan ta kere cu e turista deteni mester keda den prizon y e mester para responsabel pa tur daño ocasiona tanto fisico como material.

Solicitud na ministernan

Igualmente el a solicita pa nan coleganan femenino lo por haya algun training di defensa personal of instrumento cu lo por yuda nan den cualkier caso di maltrato, ya sea fisico of verbal durante nan trabou.

P’esey como taxista uni nan ta pidi pa husticia prevalece y cu peso di ley lo por cay riba e persona aki, ya cu e casonan di agresion contra e taxistanan ta birando frecuente. Nan a laga sa cu lo traha un carta tanto pa minister di Husticia, sr. Arthur Dowers como pa minister di Turismo y Transporte Publico, sr. Otmar Oduber, caminda nan lo trece e puntonan di preocupacion aki. Tambe nan a pidi un reunion pronto cu ambos mandatario pa asina garantisa nan siguridad y esun di nan coleganan taxista femenino durante nan trabou, specialmente despues di 12’or di mey anochi.

Nan ta bisa cu e situacion aki ta intolerabel, y nan ta exigi como taxista uni pa e problematica aki haya su debido atencion, ya cu esaki no tin di haber cu politica sino cu e insiguridad cu nos ta pasando aden.