E caso di turistanan agresivo of cu nan no sa comporta su mes den sitionan publico, no ta un excepcion. Diadomingo madruga, un turista hoben a keda deteni bou influencia despues cu el a causa destruccion contra un borchi di hotel y ocasiona molester den bisindario di e area di hotel.
Ayera den combersacion cu Bon Dia Aruba, Omar Baroud di Taxi 393 a tuma nota di e caso aki locual el a lamenta hopi mes. Ya cu e turista aki por atenta violentamente contra otro hende inocente, manera a sosode cu su colega taxista Grace di Taxi 161. P’esey den nomber di su coleganan taxista, y muy specialmente e taxistanan femenino, e ta haci un apelacion pa husticia prevalece den e caso di Grace, ya cu e ta algo “inaceptabel” y e por keda sosode keto bay.
Caso contra turista
El a declara cu e turista Mericano envolvi den e caso di Grace su detencion a wordo prolonga y pendiente pa su caso civil bay dilanti hues. Abogado Mohamed ta esun cu ta representa e taxista femenino.
Segun informacion cu Bon Dia Aruba a obtene fei Ministerio Publico, e turista P.S.M. naci na aña 1985 ta confronta acusacionnan serio. E ta wordo acusa di ladronicia cu violencia cu a trece como consecuencia lesion grave pa e taxista. Pero tambe e turista aki ta wordo acusa di intento di violacion cu ta haci su caso mas dificil. E sospechoso Mericano P.S.M. ta actualmente den e fase di detencion cu yama “bewaring”.
Igualmente sr. Baroud por tuma nota den prensa cu abogado di e turista a expresa cu su cliente ta dispuesto pa pidi disculpa na e taxista femenino fisicamente maltrata.
“E no ta bay asina aki”, asina cu hopi indignacion el a bisa. Sr. Baroud a agrega cu Grace a haya hopi golpi na su curpa, caminda e por a muri pa consecuencia di e maltrato aki. Grace di Taxi 161 a keda interna den cuido intensivo, pero actualmente e ta “recuperando basta bon”, segun sr. Baroud a bisa.
Reunion cu minister Dowers
Di otro banda, sr. Baroud a bisa cu nan a abstene di manda un carta na gobierno pa expresa nan preocupacion di insiguridad cu nan confronta tur dia. El a bisa cu generalmente e taxistanan ta 16 ora riba caminda, y ora cu nan ta sali fei cas, nan no sa si nan ta bin bek. E no kier zona dramatico, pero el a bisa cu e peliger cu nan ta confronta tur dia riba caminda ta varia. E por ta un caso di accidente serio, atraco cu arma, etc…
Sr. Baroud a bisa cu nan ta pendiente e siman aki pa reuni cu minister di Husticia, sr. Arthur Dowers, kende a compromete su mes pa e caso aki di e taxista Grace lo haya su atencion debido. E gremio di taxista lo bin cu dos peticion cerca e mandatario: E prome tin di haber cu husticia prevalece den e caso di Grace. E di dos nan lo pidi pa e taxista femenino lo por carga un aparato di shock electrico pa defende nan mes.
