E gremio di taxista, particularmente e taxistanan femenino, tin temor pa realisa nan trabou specialmente den oranan di anochi. Loke a sosode diabierna mey anochi cu nan colega Grace di taxi 169 ta un señal bon cla pa nan cu autoridad mester actua cu man duro y bin cu medidanan cu lo por garantisa nan siguridad.
E taxista femenino aki a subi un turista masculino cu despues a bira su burdugu. E persona aki, un turista Mericano di origen Rusiano, a maltrata e señora formalmente y horta su auto. Grace su situacion ta delicado ya cu e turista a kibra su nanishi y a pasa auto riba dje kibrando como seis ribchi di dje. Pero no solamente e taxistanan ta wordo agredi fisicamente sino cu lamentablemente y cu masha frecuencia nan ta wordo agredi verbalmente y mentalmente tambe.
Mas caso di violencia
Nan ta haya cu loke a sosode cu su colega Grace kende a bira victima di maltrato brutal di un turista no ta un excepcion. Ya den pasado e mesun Grace a bira victima di intimidacion di un cliente supuestamente turista cu a pone un revolver den su cabes. E biaha ey, danki na Dios no a sufri niun daño, pero si emocionalmente el a keda traumatisa. Tambe otro colega di nan, Esther a pasa den otro situacion desagradabel recientemente. Tambe un caso a yega di sosode cu nan colega di taxi 242 caminda e tabata haci un servicio despues di un actividad carnavalesco y e persona a hinca su persona malamente. Tin mas caso cu taxistanan ta wordo ataca den man di nan cliente turista, specialmente taxista femenino manera e caso di esun di 285, pero tin biaha nan ta caso cu nunca a bin afo.
P’esey taxistanan femenino manera Lupe Croes y Olinda Perez hunto cu nan coleganan en general, a expresa nan preocupacion y nan ta pidi un castigo pisa di husticia contra e turista cu a agredi malamente na Grace. Pero di otro banda, nan a pidi pa ley permiti instrumentonan di defensa personal pa e taxistanan lo por defende nan mes den caso cu un cliente lo purba di ataca nan.
Durante un conferencia di prensa na Orange Plaza, e taxistanan en general a pidi pa gobierno y directamente minister Dowers di Husticia y Minister Otmar Oduber di Transporte Publico y Turismo pa nan busca un modo pa asisti e taxistanan pa nan proteccion, ya sea via di un aparato of training di defensa personal. Nan a keda di traha un carta pa ambos mandatario tene cuenta oficialmente di nan exigencia; y tambe pa e taxistanan lo por haya un reunion cu minister Dowers y minister Oduber pa canalisa personalmente nan preocupacion.
Taxistanan femenino
Taxista femenino manera Sra. Lupe Croes di taxi 239 tin mas cu 24 aña trahando den e ofishi aki. Nan ta traha anochi ya cu nan tin nan motibo familiar y personal cu ta exigi di nan pa traha te hasta den oranan di madruga. E ta un colega di hopi aña di Grace kende a wordo interna den cuido intensivo na hospital debi na e golpi violento cu el a ricibi di e turista kende actualmente ta deteni.
E ta sinti hopi dolor y indignacion pa e agresion cu su colega y amiga Grace a pasa aden. Sra. Croes a declara cu nan ta core cu hende den auto y nan no sa si e persona ey ta un criminal of si e ta un abusado sexual. “Nos no sa ki tipo di persona nos ta haya den auto y nos no tin defensa. E ta algo hopi di lamenta pasobra e ta mescos cu un lobo bisti cu paña di carne…”, el a bisa.
Locual a haci mas dolor como hende muhe, y cu ta algo cu ta afecta nan masha hopi mes, ta e caso di Grace, ya cu recientemente otro colega di nan (Esther)a wordo agredi malamente.
“Loke a pasa cu Grace tambe lo por pasa cu nos. Mi ta sinti hopi locual a pasa cun’e”, el a bisa masha conmovi. Hunto cu su colega taxista y di forma unanime, el a pidi pa husticia por haci algo pa medio di un castigo ehemplar contra e turista abusado. Nan ta haya cu si e turista aki a haci daño e mester wordo castiga di forma ehemplar, mesun situacion lo pasa si un turista Arubiano lo haci e mesun acto violento aki na Merca.
Otro taxista, sra. Olida Perez di taxi 81 a pidi den nomber di su coleganan femenino pa gobierno y autoridad competente por haci algo cu e situacion di insiguridad aki. Como taxista femenino nan no kier bay asina leu di abstene di traha den oranan laat di anochi, ya cu e actividad aki ta nan trabou y esun cu ta garantisa nan pan di cada dia.
“Hopi biaha como taxista hendenan no por culpa nan pa kico nan ta traha anochi. Of pakico nan no ta traha, pasobra hopi di nan tin nan motibo y nos tin cu respeta nan”, e taxista Olinda Perez a bisa. Tin biaha e taxista femenino ta sacrifica su mes di traha anochi cu tur e peliger cu esaki lo por trece pe, ya cu den oranan di dia nan tin nan yiunan cu ta bay scol.
Sra. Perez ta un taxista veterano masha balente cu a yega di pasa den situacion no agradabel; pero el a sa di defende su mes. Antes nan tabatin un sistema di luz como alarma cu GPS cu nan tabata activa abou di stoel y cu tabata alerta nan coleganan ora cu e taxista tabata den un situacion di peliger. Pero e sistema aki nan a laga cay. ya cu e tabatin su gasto cun’e.
Antes sra. Perez tabatin un aparato di shock coriente den situacion di peliger pero recherche a adverti cu e no mag di uza esey ya cu si algo pasa cu e hende, e ta keda directamente responsabel dilanti husticia.
Den otro caminda e taxistanan internacional por uza tanto e aparato di shock coriente of e pepper spray pa defende nan mes, pero akinan e taxista no tin absolutamente nada pa defende nan mes, ya cu e ta ilegal. Nan ta pidi cu aworaki pa loke ta pasando si e gobierno por yuda nan pa nan tin algo pa por lo menos defende nan mes.
