Recientemente riba su pagina di Facebook, minister demisionario di Transporte, Ursell Arends (Raiz) a comparti un imagen di un ‘Onboarding Session’ cu a tuma lugar pa taxistanan cu recientemente a ricibi nan permiso di taxi.
Tabatin 50 vergunninghouder nobo cu a participa den e sesion.
Segun e minister, e sesion a conta cu presentacion di entre otro Departamento di Transporte Publico, Aruba Certification Program, Aruba Conservation Foundation, ministerio di Transporte, y RBC, unda a toca puntonan di atencion, manera e necesidad pa servicio anochi, cumplimento cu belasting, maneho y ley, opcionnan pa regla pensioen y demas informacion/guia cu ta disponibel na taxistanan como entrepreneurs.
Minister Arends a bisa cu meta di e sesion aki tabata “pa nos por splica cada un di e vergunninghoudernan nobo kico ta rekisitonan cu nos kier mira y kico ta e informacionnan cu como embahadornan di Aruba nos kier pa nan comparti cu nos turistanan.”
Arends a bisa cu a “suplica” e 50 participantenan pa nan por traha den oranan di anochi, ya cu “aworaki nos ta mira mayoria di e criticanan ta bini tanto for di e doñonan di restaurant, tambe for di e hoteleronan, pero tambe for di bishitantenan di nos isla. Y esaki conhuntamente nos a palabra cu nos lo traha hunto pa asina engrandece e servicio cu tur taxista ta brinda na nos bishitantenan, pa asina akinan sigui eleva producto Aruba.”
