Despues cu un grupo di taxista a tene dos dia di accion di protesta contra e cambio den e maneho di traspaso di permiso di taxi y e cantidad di pasahero cu taxistanan por transporta, anuncia pa minister di Transporte, Ursell Arends, un grupo di taxista a tene e di dos reunion cu minister Arends pa sigui dialoga riba e topico.

Minister Arends a reuni cu shete representante di e taxistanan y nan representantenan legal na Bestuurskantoor pa asina continua cu e dialogo riba dos decreto ministerial cu ainda no a drenta na vigor.

E prome decreto, minister Arends a indica, ta enfoca riba puntonan di interes general, particularmente pa crea oportunidad igual pa tur ciudadano cu ta desea di bin na remarca pa un permiso di taxista. Den otro palabra elimina e monopolio di taxista cu ta existi pa hopi aña.

E di dos decreto ministerial ta cu lo aumenta e capacidad permisibel di asiento den vehiculo di taxi, di 5 pa 7 asiento.

Minister Arends a splica mediante un comunicado cu durante e reunion el a sigura na e taxistanan cu el a bin pa scucha nan y presenta nan su punto di bista pakico e cambionan den e decreto ministerial ta necesario. E dos puntonan primordial pa e mandatario ta pa tin oportunidad igual y combati corupcion.

Apart di e dos puntonan primordial ya caba menciona, un di e preocupacionnan tabata e reglamento di pensioen pa taxistanan. Pa esaki E mandatario a tuma e iniciativa riba su mes pa acerca varios pensioenfond pa wak ki posibilidad tin pa e taxistanan. El a indica cu e posibilidad tey pero taxistanan mester organisa nan mes y regla nan situacion financiero. Un prome paso ta pa inscribi na Camara di Comercio.

Despues di e prome sesion cu e minister a tene cu e taxistanan dia 6 di augustus, el s presenta e concepto pa e ehecucion di su maneho relaciona cu traspaso di permiso, incluyendo interes general y oportunidad igual pa tur ciudadano cu kier yega na remarca pa un permiso. Minister Arends a remarca cu di su banda e lo yuda y facilita e titularnan di permiso te unda ta posibel, pa yega na areglonan financiero responsabel, incluyendo pensioen, seguro y cumplimento cu deber fiscal.

E maneho di e mandatario tambe lo dedica atencion na empodera e posicion di hulpchauffeurs y cambio den un sistema tradicional cu a trece privilegionan pa un grupo cu no necesariamente ta sirbi interes general.

Minister Arends a indica cu e lo sigui dialoga cu taxistanan riba e topiconan di e concepto di decreto ministerial y diaranson 21 di augustus lo tin otro reunion cu e taxistanan.

Relaciona cu esaki, Bon Dia Aruba a acerca minister Arends pa puntra con e reaccion di e taxistanan tabata, si nan tin mente mas habri pa e concepto nobo cu el a presenta y si tin algun indicacion cu e taxistanan lo tene un accion di protesta den futuro cercano. Bon Dia Aruba no a ricibi un contesta prome cu e ciere di nos edicion.