Representantenan di e bondnan di taxi y chauffeurnan di autobus a cera cabes. Den e caso aki pa no acepta e decreto ministerial imponi pa minister di Transporte, Otmar Oduber. Mientras tanto, e cambio cu a bin den e ley di transporte publico a drenta na vigor dia 1 di juni ultimo, e chauffeurnan ta keda sclama pasobra e decision aki no a wordo consulta cu nan y a djis yega buta.
Tanto e vocero di e bond di taxi como di e chauffeurnan di autobus, a expresa nan preocupacion riba esaki. Blanca Orman, un figura cu ta basta den publicidad den e ultimo dianan a expresa den un conferencia di prensa cu nan a manda un carta abierta pa e minister en cuestion, despues cu nan a lesa den prensa e puntonan cu e decreto ministerial aki ta contene, cual echo a wordo firma dia 26 di maart y publica dia 31 di mei.
Carta abierta
Taxistanan ta pidi rectificacion riba e introduccion di e MB (decreto ministerial), fecha dia 26 di Mei, cu ta pa falta di siguridad, calidad y desconfiansa den transporte publico, tachando tur personanan cu tin e permiso di taxi, tour, “ongeregeld vervoer” y autobus. Tampoco taxistanan no ta acepta e articulo 2 riba e MB, fecha dia 26 di mei. E articulo 2 aki ta kita e derecho den caso di un traspaso. Ta hasta kitando derecho di un famia. Motibo principal ta cu e ta un derecho den Decreto Nacional AB 1995, GT 23. Articulo 15, lid 1 ta masha specifico cu ta na dos ocasion minister ta firma un traspaso. Ora cu e personanan cu tin e permiso fayece, of den e caso di e taxistanan, un dokter di SVB declara e personanan cu tin e permiso cu no por traha mas. Decreto Nacional ta accentua tambe cu e traspaso ta pa famia, pa asina sigui mantene e famia. E Decreto Nacional ta reconoce e dos ocasionnan ey so pa haci e traspaso y ningun otro.
Taxistanan lo no permiti pa keda sin e derecho ey di articulo 15, lid 1. Cu e articulo 15, tur 450 taxi tin e mesun derecho, mescos cu nan famia. No por acepta e MB articulo 2, pasobra un traspaso lo bira a base di decision personal of politico y e derecho lo no ta igual mas. Esaki ta loke e taxistanan a indica den un carta abierta pa minister Otmar Oduber. Esaki ta pa trece aclaracion pa stop e confusion cu tin na e momentonan aki. Dia 8 di juni, riba peticion di minister di transporte, representantenan di taxistanan a asisti na un reunion pa scucha so y despues a reuni y saca un solo comunicado.
E ponencia cu minister Oduber a trece na e reunion durante 8 di Juni ta cu e MB ta pa stop di fenomeno di bendemento di permiso y cu tur cos lo keda mesun cos. Taxistanan ta di opinion ta cu nan no ta esun cu ta firma e traspaso, pero ta e minister mes ta pone su firma. Si tur cos ta keda mesun cos, dicon tin cambio den articulo 15 lid1, pa e articulo 2 di e MB. E taxistanan no ta di acuerdo cu e articulo di e MB y ta ocupa, como cu el a sali publica dia 31 y a drenta na vigor dia 1 di juni na prome instante mester a acerca tur e coleganan pa wak e articulo cu a sali publica. Lesa e articulo di e , si ta di acuerdo cu esaki si of no y pa tuma tempo pa reacciona.
No ta facil pa haya tur 450 taxista di biaha. E trabao ta riba caminda y ta dificil pa cada biaha stop y acerca y asina ey cu un conferencia di prensa aki, ta trece mas den claridad kico ta nan punto di salida y asina mas taxista, te awor aki te ainda no a wordo notifica, ta haya sa di e noticia aki y pa cuminsa reacciona, Orman a splica.
Chauffeurnan di Autobus
E chauffeurnan di autobus a uni na e taxistanan den e mesun lucha aki y nan tambe a expresa nan preocupacion durante e conferencia di prensa, cu a tuma luga diaranson.
Lisette Winklaar, vocero di e chauffeurnan di autobus a splica cu nan no ta di acuerdo cu e punto cu minister kier bin cun’e y ta para tras di e taxistanan, tur e otronan tambe, pasobra ta algo inaceptabel.
E mesun regla cu ta conta pa taxistanan, ta conta pa nan tambe. Chauffeurnan di autobus tambe tin e sistema di traspaso di e permisonan. Winklaar a splica cu actualmente ta pasando den un caso cu lo bay wak kico ta pasa, caminda cu un persona a caba di fayece y ta bay wak ki decision e minister lo bay tuma riba e permiso eynan awor aki. Supuestamente un famia lo tuma esey over, cual ta para den ley bieu. Loke e minister kier awor aki, ta trek in e permiso y e lo dicidi ken e lo duna. Segun regla bieu, famia tin derecho riba e permiso.
E chauffeurnan di autobus ta para tras di taxista y tur cu ta den transporte publico
Winklaar a agrega cu tin cu imagina cu ta sali for di cas tur dia, a haya un accidente y a keda invalido. E permiso a cay den man di otro persona. Si el a cay den man di un yiu, e sa cu tin hende cu por sostene e personanan cu tin e permiso original. Si e cay den man di otro hende, ta kico ta bay para di e persona. Nan no ta depende di pensioen, ni nada. Cu e sa cu e ta keda den man di un famia, sa cu tin un hende cu por sostene e personanan cu tin e permiso original.
Actualmente nan ta ocupa ta colectando firma pa asina por tambe bay cerca minister cu un manifiesto completo y tin cu bisa cu tin basta coredo di bus, for di San Nicolas cu 68, pasando den Santa Cruz cu 11, Noord cu 15 y awo tin di compronde cu tin 10 mas ta saliendo cu e ruta di Noord/Ponton, Winklaar a splica.
