Den e simannan cu a pasa por a mira un grupo di taxista malcontento cu e maneho nobo anuncia pa minister di Transporte y Integridad, Ursell Arends, unda cu no solamente a blokia trafico dilanti cas di gobernacion pero a opta pa bay blokia entrada di aeropuerto cu ta un parti vital pa economia di Aruba.

Partimento di permiso un dia prome cu eleccion 2021

Permiso di taxi cu V y T/O cu ta patrimonio di pueblo di Aruba semper tabata un instrumento politico unda cu ta conoci cu partidonan grandi a duna permisonan na friends and family, campañadonan di partido y coordinador di ministernan, net prome cu dia di eleccion di aña 2021.

Ex-minister di Transporte Chris Romero ken ta sospechoso di husticia na e momentonan aki den caso Kwihi, a haci fiesta otorgando riba e mesun dia un cantidad di 164 permiso, un dia prome cu eleccion 2021. Den esaki, ta inclui su miho amigo y campañado di un minister actual di MEP na momentonan aki, sponser di partido di MEP a bay asina leu di duna na 1 solo persona 96 permiso.

E sistema na e momento aki ta coruptivo caminda permisonan ta keda den famia of ta wordo duna na campañado y sostenedonan di partido y hasta ta ser bendi ilegalmente.

Bon Dia Aruba a cuminsa un investigacion periodistico riba e tema di permiso di taxi pa haya contesta riba e pregunta crucial si mag di bende un permiso di taxi.

Caso den corte ‘CROES’ contra ‘TROMP’

Dia 8 di Juli di 2022, un ciudadano di Aruba di fam Croes ken ta doño di un permiso di taxi a dicidi di bende su permiso na un otro ciudadano di fam Tromp, e caso aki a bay asina leu cu hasta a traha un contract riba papel cu e prijs total di e permiso e cual ta di 90.000 florin cu un downpayment di 40.000 florin.

Awor, na 2024 a bin problema entre Tromp y Croes tocante e permiso di taxi aki, na unda Tromp a dicidi di hiba Croes cu ta doño di e permiso na corte pa pidi su 40.000 florin di downpayment back. Den esaki, corte a dicta cu Croes tin cu duna Tromp su 40.000 florin back, mas interes desde 2 di november 2023, ademas e mester a paga tur gasto di corte.

Croes mester a duna Tromp back su placa cu el a bende di e permiso ilegal y ta keda sin permiso di taxi.

Benta y huurmento permiso di taxi

Bon Dia Aruba ta investigando mas caso di benta y huur permiso di taxi unda cu a traspasa permiso pa un hulp chauffeur y uso indebido di un permiso, unda en bes di cu e reemplasante ta den servicio, ta drenta den un tipo di ‘huur’ di e permiso cu ta suma entre 150 dollar te hasta 350 dollar pa dia y e vehiculo na e reemplasante y e doño di permiso no ta traha.

E ocupacion di taxista na Aruba ta uno hopi yamativo mirando e cantidad di bishitante cu Aruba ta ricibi, e cantidad placa cu nan ta gana y “flexibilidad di e trabao” ya cu e taxista mes ta dicidi e orario cu nan ta traha.

Na mas di un ocasion personanan interesa den cumpra permiso di taxi sa bin pa dilanti puntrando tocante esaki y aunke legalmente esaki no ta permiti , tin mas indicacionnan cu tin hende ta haci e tipo di negoshinan aki ainda “bao mesa”.

Investigacion den e caso denomina como ‘Kwihi’

Bon Dia Aruba a haya informacion concreto di un fuente cu ta forma parti di e investigacion Kwihi unda e ta informa un nomber specifico cu a haya su permiso di taxi 1 dia prome cu eleccion di aña 2021 cu presuntamente e persona a cumpr’e via compania MADBOR CONSULTANCY y e compania aki a fungi manera un uitzendbureau pa e ex-mandatario Chris Romero y ta sospecha cu a ricibi placa di manera fraudulento di Pais Aruba via e compania aki.

Den cuadro di transparencia Bon Dia Aruba ta publica e sentencia redacta pa respeta privacidad y e contract di caso den corte ‘TROMP’ contra ‘CROES’ unda a bende permiso di taxi ilegalmente y tambe ta publica y anonimisa e nombernan y number di e personanan cu a haya 164 permiso e cual a ser duna door di ex minister anterior di Transporte, Comunicacion y Sector Primario Chris Romero cu na momento aki e ta sospechoso di husticia pa un investigacion tocante acuerdonan di servicio (dienstverleningsovereenkomsten) den e periodo 2017-2021.Tambe ta conoci cu a cera cu varios persona huridico (rechtspersonen).

Romero tabata minister den Gabinete Wever-Croes I, for di aña 2017 pa 2021. Investigacion a cuminsa na februari 2021 cu entradanan hudicial bao guia di hues-comisario cu a tuma luga na varios adres relaciona cu e investigacion di algun contract di servicio cera door di ex-minister Chris Romero, tempo cu e tabata den su funcion como minister. E zoekingnan a tuma luga na cuatro adres unda a bay cu administracion di compania, computer y varios hard disk cu ta elementonan crucial pa e investigacion di Landsrecherche.