Taxi cu capacidad te cu 9 asiento ta haya dispensacion di impuesto di importacion

Minister di Comunicacion, Transporte y Sector Primario, Chris Romero a duna un conferencia di prensa dialuna ultimo, pa splica cu vehiculo pa servicio di taxi cu capacidad te cu 9 asiento ta haya dispensacion di pago di impuesto di importacion.

Di esaki, el a bisa cu algun siman a tras a surgi un confusion tocante invoerrecht riba taxi. Asina mes el a expresa cu pa hopi aña taxinan por bin cu vehiculonan mas grandi caminda nan ta keda haya invoerrecht.

Na comienso di februari, Cuerpo di Aduana a dicidi di elimina invoerrecht pa esunnan cu kier bin cu vehiculonan mas grandi. Pero ora ministerio a tuma nota di esaki, a dicidi di tuma accion pa purba di acomoda y yuda taxinan cu esaki.

“Esaki ta motibo cu no tin sentido pa sigui ley y e realidad ta otro cos”, Romero a comenta.

El a splica cu ta permiti pa un taxi tin maximo 5 pasahero cu no ta inclui e chauffeur. Den otro palabra, pa persona por haya invoerrecht mester ta den e area aki.

Romero a trece dilanti cu un auto tipo ‘sedan’ no ta bay carga 5 pasahero. Como cu Aruba ta un pais turistico, e persona ta transporta turistanan y mester por hinca maletanan den e auto; y si ta bay cobra pa persona den auto, esey no ta cuadra cu e realidad. Tambe si e turista ta trece mucha bou di dos aña, e no por ta sinta den scochi, e auto mester tin un stoel special pa siguridad di e mucha.

A base di pensa cu logica, Romero a aclaria cu si nan kier duna servicio pa famia cu ta bin cu maleta, muchanan chikito bou di dos aña, e momento ey mester di un auto mas grandi.

“Bo no mester mantene bo mes na un auto sedan den cual bo no por brinda servicio cu ta poni den vergunning”, el a sigura.

A base di esey, Romero a señala cu el a acerca pa e parti di finanzas, pa nan por yega na algo pa e taxistanan cu ta busca un auto mas grandi, por haya un exencion di invoerrecht, locual a ser aproba diabierna ultimo den Conseho di Minister.

Tambe el a informa cu e cantidad di asiento a ser aproba pa 9; aunke no mag di transporta mas di 5 persona incluyendo e chauffeur y pa duna espacio pa pasaheronan menor di dos aña.

Esaki tabata un di e problemanan cu a surgi cu diferente taxista pa motibo cu nan tabata yama pa bisa cu nan no ta haya dispensacion di pago di impuesto di importacion, pa via cu Aduana a dicidi di cobra a base di personenvervoer y esey no ta e realidad, el a finalisa.