Un imahen cu ta bayendo viral na henter mundo ta esun di un tata cu yiu, kendenan ambos a muri den nan intento pa drenta Merca via Rio Bravo, cual ta un riu cu ta dividi Mexico y Merca. Den e imahen por mira cu e mucha di casi 2 aña tabata brasando su tata.
Segun e Ministerio di Relacionnan Exterior di El Salvador, e homber y su yiu lo a fayece diadomingo atardi na momento cu nan a wordo lastra pa e riu. E curpanan mientrastanto a wordo haya dialuna ultimo.
Presidente di El Salvador, Nayib Bukele, a informa via medionan social cu e oficina di presidencia, cu nan lo cubri e gastonan pa trece e curpanan bek nan pais y tambe lo asisti e famia di financieramente.
E gobierno di El Salvador mientrastanto a declara di ta lamenta e caso aki y ta urgi e ciudadanonan di nan pais pa no riesga nan bida di e forma aki, principalmente esnan di e muchanan.
