Ayera a tuma luga e reunion di Beach Policy unda cuater minister a traha un decreto ministerial caminda cu e taskforce ta haya man liber pa actua y percura cu ordo ta wordo reestableci riba nos beachnan.
Esaki ya gobierno a anuncia caba despues di tabatin problemanan entre companianan di watersport atrobe, manera Bon Dia A publica e siman aki. E resultadonan di e reunion nos a ricibi den e siguiente relato:
E ultimo sucede riba nos beachnan a shock nos comunidad den un forma negativo cual no ta aceptabel. E 4 ministernan y departamentonan concerni a sinta hunto pa sigura cu e maneho di ‘3 strikes you’re out’ ta siguiendo su curso y cu esaki ta wordo implementa.
E reunion tabata entre Minister di Infrastructura, Minister di Turismo, Minister di Husticia, Minister di Transporte, departamentonan den KPA, DIP, DOW, DSA y DWJZ, cual ta esunnan concerni pa trata e maneho y conducta di esunnan cu ta opera di riba nos beachnan.
Manera ya a declara, lo tin cero tolerancia pa e tipo di actitudnan aki pa cual un taskforce a wordo instala pa reenforsa esaki.
Minister Otmar Oduber a indica, cu cero tolerancia lo wordo aplica riba nos beachnan y den cuadro di esaki a forma un taskforce entre tur e departamentonan y instancianan concerni cu control. Dentro di poco lo inicia cu controlnan severo riba tur locual ta trata permisonan cu personanan tin. Bouwvergunning, e aspecto di siguridad, comportacion, siguridad di botonan cu ta opera, watersports, hotelnan cu tin nan stoelnan y parasolnan riba beach entre otro.
E taskforce aki lo keda existi den futuro pa di e forma aki departamentonan keda traha na un forma coordina cu otro, pa evita cu ta sosode locual cu a sosode riba nos beachnan.
”Pa conclui cu e cara di Aruba ta sumamente importante y mester wordo cuida pa garantisa desaroyo economico y bienestar di nos turismo. Mas ainda, e aspecto di conducta riba nos beachnan y condicionnan cu ta mara den e precario cu cada persona a haya mester wordo respeta. Pues esey ta bay encera e trabou cu ta bay cuminsa aworaki”, segun minister Oduber.
