No ta un secreto cu algun trahadonan di companianan di tour ta confronta entre nan mes na waf di barco crucero pa asina nan por haya e turistanan pa nan por realisa nan tour. Mirando cu proximamente e edificio dilanti waf na unda DOW tabata ubica algun añanan pasa ta bay wordo renoba, a bin dilanti e pregunta si lo tin un regulacion pa tin mas control den esaki.
Mark Figaroa, director di Aruba Ports Authority, a informa den un conferencia di prensa di ayera mainta cu nan a atende e diferente keho cu tin pa loke ta trata control di companianan di tour na ora cu cruceronan ta yega na wak di Aruba.
“Nos ta entende cu tin cierto dificultadnan eyfo tin ora. Nos ta bezig cu un plan conhuntamente y tin un task force estableci. Cruise Tourism Task Force cu aunke durante pandemia esaki no a sinta manera mester ta, aworaki e operacion ta full back na unda nan ta pick up esakinan tambe unda por mehora e operacion eyfo. E task force ta consisti di varios stakeholder incluyendo polisnan y ATA, y tur ta forma parti di esey unda cu nos a busca un miho solucion pa atende cu esaki,” Figaroa a sigura.
E confrontacion entre companianan operador di tour pa motibonan di prijs manera a wordo sigura dilanti di turistanan loke ta un mal bista pa Aruba. Den e edificio aki ta bay tin un Visit Information Center di ATA cu ta bay duna informacion na turistanan di Aruba su cultura, su luganan mas turistico, entre otro, e ta bay enfoca mas riba e parti di operacion, segun Figaroa a sigura.
Tambe el a bisa cu nan ta den combersacionnan di parti di APA cu otro stakeholder pa loke ta trata bringamento cu prijs y nan sa esey, “pero nos tin cierto proyectonan den pipeline cu ta bay wordo atendi cune y unda cu nos por busca un solucion pa minimalisa y evita tur esakinan,” el a finalisa.
