Gobierno a institui un task force cu lo bay percura pa cumplimento di leynan manera ley di cacho y ley di saco di plastic. E task force ta consisti di City Inspectors, polis y hurista. Tambe segun City Inspector, e control riba tiramento di sushi den mondi lo bira mas pisa di awor pa dilanti.

Desde dia 2 di april 2018 lo tin un meldpunt (punto pa haci denuncia) cerca City Inspector caminda cu esaki lo wordo haci via campaña di conscientisacion tambe pa nos comunidad. Cu tur loke tin di haber aworaki nan riba e tereno di leynan cu tin di haber cu nos naturalesa y medio ambiente por wordo denuncia eynan. Lo por entrega keho eynan si tin maltrato riba bestianan, si ta mira restaurantnan of otro negoshinan cu ta haci uzo ainda di saco di plastic of awa di pos tira riba caminda. Y tambe cualkier señal di dumpnan ilegal.

Cu e task force nobo aki, pueblo por tin e siguransa cu lo bay cumpli cu e respet pa nos leynan riba tur nivel segun minister di infrastructura Otmar Oduber (POR). No solamente leynan di codigo penal pero tambe e leynan den bijzondere verordening. Esaki ta logro di trabao conhunto entre ministerio encarga cu husticia, infrastructura y medio ambiente. Durante ultimo lunanan tin varios trabao andando pa locual ta cambio den e maneho di Bureau City Inspector segun gobierno. Nan a firma un decreto ministerial – cu un backup di un Landsbesluit (ley) – por medio di ministernan di infrastructura y husticia caminda cu bao departamento di City Inspector ta crea un task force encabesa pa ex polis Kenny Montero, Danilo Prescott y Belinda Maduro.

Nan ta autorisa pa por parti sancion y multa. “Ideanan a wordo treci hunto riba con nos por atende cu situacionnan cu ta haci hopi dolor den comunidad. Por ta chikito pa loke ta e maneho general di un gobierno, pero cu ta pisa masha hopi pa un ciudadano cu ta biba den barionan rond Aruba,” segun minister Oduber. E minister ta deliberando cu minister di husticia pa e aña aki tur e inspectornan lo haya e mesun autoridad aki pa por actua riba e diferente puntonan di regulacion y control cu mester tuma luga den nos comunidad.

Cambio den manera di traha
E schedule y manera di traha di City Inspector lo ta cambiando na consecuencia di e decisionnan nobo aki cu a bin pa sorpresa pa City Inspector. “Pero cu toch a cay sigur den bon tera cerca nos,” Danilo Prescott di City Inspector ta bisa Bon Dia.
Sr. Prescott ta bisa cu naturalmente City Inspector lo haya nan mes cu mas trabao pero tambe lo traha mas cerca di hende. “E ta un reto nobo y nos ta habri pa tur reto cu bin. Vooral riba e ley di cacho cu lo cay bao di sr. Montero cu tin mas experiencia den esaki manera ex polis.” Cachonan riba caya cu tin un doño lo wordo poni responsabel pa cu e bestia riba caya. Sr. Prescott hunto cu sra. Maduro lo percura mas riba e parti di naturalesa y medio ambiente.

Wowo mas habri pa sushi den mondi
Pa locual ta e parti di sushi mes lo keda mescos na City Inspector lo keda atende esey pero atrobe ta tres persona so ta autorisa pa parti multa ora mester yega na esaki.

“E manera di traha conhuntamente cu City Inspector lo cambia tambe cu City Inspector sigur lo tin wowo mas habri. Nos lo ta coriendo mas hopi principalmente na e mondinan pasobra mayoria bes tin mas sushi grandi den mondi tira. Pues nos ta bay cuminsa pone City Inspector patruya mas den e mondinan y asina busca manera di gara e personanan akinan. Door cu awor tin tur e autoridad necesario lo purba gara nan pa sanciona di biaha,” segun sr. Prescott.

Den e tarea amplio anto hopi importante cu Cuerpo Policial tin cu otro departamentonan, hopi biaha ta perde e atencion pa motibo di trabaonan hopi mas grandi pa por confronta algun aspecto manera ley di cacho of otronan.
E ley di Hinderverordening lo ta hancra den e decreto ministerial akinan y Landsbesluit pa por actua riba dje na departamento di City Inspector. “Berdad ley ta pasa pero no ta ekipa y duna autoridad pa controlnan tuma luga manera e ley tan critica di cacho.
Esaki tambe lo cay bao City Inspector y tur loke ta bijzondere verordeningen.”

Mas trabao y cambio na caminda
Minister Oduber ta laga sa cu tin hopi otro leynan na caminda pa loke ta medio ambiente, por ehempel un cu ta trahando riba dje awo pa locual ta uzo di foam box y tur material cu ta dañino pa bida marino lo keda prohibi. Lo mester reemplasa esakinan cu material biodegradable pa proteha nos beachnan anto e ley lo keda hancra cierto momento na permiso otorga na tur restaurant, pier y barnan. Anto e tipo di bijzondere wetgeving manera esaki lo ta cay bao hurisdiccion tambe di City Inspector ora cu mester yega asina leu. E task force nobo aki lo raporta directo na ministernan di infrastructura y husticia pa di e forma aki tambe tin e autoridad pa por actua.