Ayera durante un conferencia di prensa, prome minister demisionario Evelyn Wever-Croes a declara cu Covid-19 ta ‘bao control’. Segun resumen di Departamento di Salubridad Publico DVG, e siman aki e tasa di positividad entre nos residentenan ta alrededor di 5%, loke segun Organisacion Mundial di Salud, ta indica cu e pandemia ta bao control.
Segun relato di DVG ayera, e cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 497 test. Ademas, DVG a informa cu e tasa di positividad (‘positivity rate’) entre nos residentenan ta 6%. E tasa di positividad ta e porcentahe di test positivo cu a sali entre tur test cu a haci. Organisacion Mundial di Salud (WHO) desde comienso di e pandemia a indica cu un tasa di positividad di 5% ta indica cu e pandemia ta bao control. Den ultimo siman, por nota cu berdad nos tasa di positividad ta keda rond di 5%. Sinembargo, pa mantene esaki ta necesario pa tur hende cumpli cu tur protocol, incluyendo haci test y tambe tuma vacuna.
Den otro informacion di pandemia, DVG a informa cu ayera 19 persona a recupera y a registra 10 caso nobo di Covid-19, di cual uno no ta residente. E cantidad di caso activo ta 70. E cantidad di fayecido relaciona cu Covid-19 no a conoce aumento, y ta 105.
Di su banda, Hospital Dr. Horacio Ouber a informa cu tin un total di 18 persona interna pa ricibi tratamento pa Covid-19. Di esakinan, 8 ta den Unidad di Cuido Intensivo (ICU) y dies ta isola riba unidad general di covid.
