Mientras cu e cantidad di casonan activo di coronavirus na Aruba ta reduciendo, por mira cu e tasa di positividad (‘positivity rate’) ta aumentando den ultimo dianan, segun e informacion mas recien di DVG.
DVG den su reporte ayera a duna di conoce cu a registra 62 caso positivo di coronavirus entre residentenan di nos isla, pa un tasa di positividad di 34 porciento.
Segun e website di Nacionnan Uni cu ta maneha e datonan di Covid-19 na nivel mundial, e cantidad di caso na Aruba, relativo na su poblacion, ta #3 den mundo. Sinembargo, e cantidad di test haci, relativo na nos poblacion, ta #24 na mundo, cu ta duna un indicacion cu Aruba lo mester ta realisando mas test. Sinembargo, DVG no a duna den su relatonan diario informacion si tin residente cu ta haci test na hospital, pa cual motibo no por a calcula un tasa di positividad general desde comienso di e pandemia. Sinembargo, for di siman pasa, e tasa di positividad ta aumentando. Dialuna, 21 porciento di test a sali positivo. Diamars 20%, diaranson 25%, diahuebs 20%, diabierna 19%, diasabra 24%, diadomingo 27%, y dialuna 39%. Asina ta mira cu e ultimo dianan e tasa di positividad a aumenta, cual ta nifica cu mas cantidad di test ta saliendo positivo.
DVG tambe a informa cu 144 persona a recupera. E total di casonan activo a reduci cu 83 persona y ayera tabata na un total di 727. A realisa un total di 388 test, di cual 184 tabata entre residentenan haci na laboratorio di hospital. Ademas tabatin un fayecido mas, aumentando e total na 26.
Hospital a informa cu tin 47 persona interna pa Covid-19, di cual 11 ta den unidad di cuido intensivo, y 36 ta isola riba piso general.
