Tasa di positividad Covid-19 na 8%

Segun resumen di ayera di Departamento di Salubridad Publico DVG, ayera e tasa di positividad, esta e cantidad di resultado positivo entre tur test haci, tabata na 8%.

DVG a informa cu ayera tabatin 13 persona cu a recupera, mientras cu a registra un total di 5 caso nobo di Covid-19, di cual 3 no ta residente. Cu esaki, e cantidad di caso activo a keda na 88. E cantidad di fayecido relaciona cu Covid-19 no a conoce aumento y a keda na 105.

Ademas, DVG a informa cu e cantidad total di testnan ehecuta na e diferente localidadnan na Aruba, entre otro laboratorio di hospital, laboratorionan priva y aeropuerto ta 553 test. Di esakinan, e tasa di positividad (‘positivity rate’) entre nos residentenan ta 8 %. Manera Bon Dia Aruba a yega di informa, Organisacion Mundial di Salud (WHO) ta recomenda pa mantene un tasa di positividad di 5% of menos, pa indica cu e transmision di e virus SARS-CoV-2, cu ta causa e malesa Covid-19, ta bao control.

Di su banda, hospital Dr. Horacio Oduber ta informa cu tin un total di 19 persona interna den hospital pa ricibi tratamento pa Covid-19. Di esakinan, 8 ta den Unidad di Cuido Intensivo y 11 ta isola riba unidad general di covid.