Tarifa di waf a bolbe subi: Diferente factor ta influencia prijs di productonan

Un factor cu tin su influencia riba prijs di e productonan cu nos ta consumi na Aruba, tin di haci cu e tarifa halto pa trece container den nos waf na Barcadera cu ta subi periodicamente. Minister di asunto Economico, Xiomara Maduro a señala cu recientemente e tarifa aki a bolbe subi, y esaki tin su efecto riba e prijsnan di e productonan.

Di otro banda 90% di nos productonan consumi localmente ta wordo importa. P’esey e ta haya cu mester evalua con nan por reduci nos importacion pa medio di stimula e produccion local. Agricultura ta un sector cu mester stimula, pero apoya e produccion local tambe pa medio di cumpra nan productonan. Igualmente e mandatario a conseha pa bin cu agricultura domestico caminda cada un di nos por reserva un espacio den nos cas pa planta y cosecha cierto productonan. El a trece como ehempel e mata di papaya cu ta crece den un pida chikito, y e ta un fruta caro.

El a señala cu otro factornan tin su rol cu ta limita cu e canasta basico por wordo amplia cu mas productonan. Considerando cu e comerciantenan tambe tin nan margen di prijs di loke nan ta bay pone riba nan productonan y loke nan kier gana tambe.

Apesar cu Aruba tin un mercado liber tin alrededor di 22 productonan di consumo basico cu ta cay bou e prijs maximo. Cu esaki e kier aclaria cu no tur producto ta conoce prijs maximo. Apesar cu e ta mustra un cantidad limita, e mandatario a bisa cu for di aña pasa e cantidad di productonan di e canasta basico a bira dobel di loke e tabata ta.

El a agrega cu no ta facil pa logra esaki, considerando cu Aruba tin un mercado liber, gobierno mester bin den acuerdo mutuo cu e companianan importado di productonan pa stipula prijs maximo na cierto productonan. E echo cu nos tin un mercado liber no por impone prijs maximo riba tur producto, ya cu esey no ta e manera cu nos mercado ta hinca den otro. Pues e ta dificil pa amplia e canasta basico si gobierno no ta haya cooperacion di esunnan cu ta tuma e risico pa cumpra e productonan afo y importa nan y trece nan ariba e mercado, specialmente fruta y berdura cu ta daña lihe. Pero si pa alivia e situacion aki gobierno ta bira un facilitado pa yuda e consumidor. El a splica cu por ehempel e macutu di compras caminda nan ta haci un comparacion di e prijsnan di e productonan, unda nan ta mas barata, ta yuda e consumidor.