(AP) — Target antes a distingui su mes como sostenedor di comunidad LGBTQ+. Awo, a mancha e status aki despues di retira algun producto cu tema di LGBTQ+ y reubicando desplieguenan di Pride Month na e parti patras di su tiendanan na cierto sitio den Sur di Merca den respuesta na keho online y confrontacionnan na su tiendanan, cual e compania ta bisa cu tabata un menasa pa bienestar di su empleadonan.
Target ta enfrentando un segundo ola di critica di clientenan cu ta molesto pa e reaccion di e minorista na activismo agresivo anti-LGBTQ+, cual tambe ta pasando door di legislaturanan estatal Republicano.
Gruponan di derecho civil na Merca a critica e compania ayera pa baha cabes pa clientenan anti-LGBTQ+ cu a bolter display y a expresa disgusto pa trahe di baña di genero fluido.
E indignacion tocante e marketing di Pride Month di Target – y su respuesta na su criticonan – ta apenas e ehemplo ma recien di e manera con companianan ta confrontando dificultad pa sirbi diferente grupo di cliente na un momento di division cultural extremo, particularmente rond di derechonan pa hende transgenero.
Bud Light ainda ta luchando cu e consecuencianan di su intento pa amplia su base di cliente door di manda un bleki di cerbes na influencer transgenero Dylan Mulvaney cu su cara riba dje, cual Mulvaney a post riba Instagram, incitando e reaccion negativo. Compania mama di Bud Light ta triplicando su gasto di marketing na Merca e berano aki purbando di restaura e perdida den benta.
Na Florida, Disney ta den un bataya legal cu gobernador Ron DeSantis desde cu a expresa oposicion na e limitenan den klas estatal riba discusion tocante identidad di genero y orientacion sexual.
Allen Adamson, co-fundador y managing partner di e compania di marketing Metaforce, a bisa cu Target mester a pensa bon e potencial pa reaccion negativo y tuma stapnan pa preveni esaki, manera varia e productonan cu ta ofrece segun region. “E pais ta hopi menos homogeno cu nunga,” el a bisa. “Pa cualkier marca, e no ta ‘one size fits all’ mas.”
Accionnan di Target, cu ta basa na Minneapolis, a cay casi 3% ayera.
Segun un encuesta Gallup na 2021, 21% di GenZ ta identifica como lesbiana, gay, bisexual of transgenero, compara cu 3% di Baby Boomers. Gallup tambe a haya cu generacionnan hoben ta mas probable pa kier marcanan promove diversidad y tuma un posicion riba asuntonan social.
“Hala atras ta lo pio cu nan por a haci,” segun Jake Bjorseth, kende ta maneha trndsttrs, un agencia yudando marcanan compronde y yega cerca clientenan GenZ. “Pa no spera potencial reaccion negativo ta nifica cu no ta compronde kico miembronan (LGBTQ+) ta pasa aden tur dia.”
Adamson a agrega cu “si bo por cambia un marca grandi djis door di tira abao un display, e ora nan ta den defensa, y bo nunca ta gana den defensa.”
