Vice presidente di Venezuela Tareck El Aissami a cualifica como ilegal y violacion di su derecho, e sancion cu Departamento di Tesoro di Merca a aplica siman cu a pasa, pa un supuesto vinculo di El Aissami cu narcotrafico.
Diaranson El Aissami a publica un carta den un pagina completo riba corant New York Times, cu tabata dirigi pa secretario di Tesoro Steven Mnuchin, cu a firma varios sancion e mesun dia di su nombramento den su posicion actual, dia dialuna cu a pasa. Den carta El Aissami a bisa cu e sancion cu Merca a dun’e “ta ilegal y ta un violacion di leynan internacional”, pasobra Departamento di Tesoro no tin evidencia y ta actua como un polis pafo di nan teritorio y nan no tin poder pa haci esey”.
Dirigente di Venezuela a agrega na su carta cu e decision ta un violacion di su derecho humano y ta afecta su dignidad y su honor. Segun departamento di Tesoro, Tareck El Aissami ta acusa di facilita, protege y supervisa carga grandi di droga desde Venezuela cu destino pa Mexico y Merca, ora cu e tabata como ministro di interior y husticia y como gobernador di estado Aragua.
El Aissami a indica den su carta, cu e sancion di vries propiedad cu e tin na Merca ta “absurdo y mahos”. “Mi no tin propiedad na Merca ni ningun otro pais”. Ta absurdo cu un curpa di administracion Mericano, tuma un medida pa vries propiedad y placa, y no mustra ningun evidencia o prueba. “Boso a wordo gaña pa sector politico” cu ta evita cu Merca y Venezuela por cuminsa di nobo cu su relacion diplomatico y politico, El Aissami a bisa. Diamars cu a pasa, presidente di Venezuela, Nicolas Maduro a expresa cu e sancion pa El Aissami ta un “agresion”.
