Tanto sapateamento… Pa finalmente entrega…

Tin algun desaroyo interesante tumando lugar. Despues di cierto incertidumbre, relaciona cu e informacion di Secretario di Estado pa Asunto di Reino, cu a yega na un entendimento encuanto e cambionan cu mester bin den e ley local di supervision financiero, awor a yega finalmente e confirmacion di banda di gobierno di Aruba cu ta existi tal acuerdo. A confirma tambe cu e adaptacion di e ley ta bay inclui e tres exigencianan di Hulanda.

Proximamente anto lo por spera cu e proyecto di ley por yega parlamento y keda aproba, y sin problema. Awor ta resulta cu e propuesta a cana su caminda legal varios luna pasa caba, loke ta duna di pensa ta kico nos a mira den ultimo lunanan: un show? Asina mes nos no lo ta tranquil tanten e aprobacion no tuma lugar. Nos no ta bisa esey solamente cu e sucesonan bergonzoso di 2019 na mente, sino tambe pasobra tabatin hopi gruñamento for di vista y oido di publico, pa finalmente yega na un punto unda no tabatin otro remedio cu acepta e condicionnan Hulandes. Probablemente esnan liga na e gobierno aki lo mira esaki como un siguiente intromision di Hulanda den nos asuntonan, pero esey no mester stroba ningun otro hende pa mira e asuntonan aki cu un mente habri y obhetivo.

Basicamente Hulanda a insisti cu lo a inclui den e ley e condicion di mehoracion di e administracion financiero, unda hopi mester sucede ainda. E siman aki nos por a tuma nota cu tin mehoracion caba ta tumando lugar den e proceso di cuenta anual, cu entrega di esun di 2019, sin aprobacion di accountant. En todo caso nos por a tende cu e trayecto aki lo keda cla dentro di algun aña, y cu aprobacion di accountant. Bon trabao, contento di tende esey, pero pakico den otro aspecto financiero gobierno no ta cumpli? Mientras pa varios aña por a conta cu un reportahe financiero, stipula den ley, cada tres luna y na tempo, de repente e aña aki nos ta canando seis luna atras, debiendo CAft, Staten y publico dos rapport caba. Si no ta pasobra Banco Central si a percura pa nan haya nan cifranan di entrada di gobierno, nos lo no tabatin ni idea di loke ta pasando e aña aki. Esaki no ta nada mas cu cumpli cu bo obligacion como gobierno. Tin algo di sconde anto? Ta parce nos cu no. En todo caso, e cifranan publica ta indica, manera por lesa den otro articulo den e edicion aki, cu gobierno su finanzas ta marchando sublime, cu un surplus cu no ta Afl. 63 miyon manera anticipa anteriormente, ni tampoco Afl. 111 miyon manera poni den e presupuesto suplementario 2023, sino posiblemente mas di Afl. 200 miyon. Gobierno e aña aki ta yega na entrada cu nan tabatin proyecta pa 2026 o 2027… Pa nos comprende esaki bon: gobierno tin un exito sin precedente den acumula entrada, y nan no kier pa nos sa? Ta promer biaha cu nan no ta bin gaba nan exito? Straño. Nos ta contento cu caha di gobierno ta bay asina bon; di tur manera nos no mester preocupa anto pa pago riba nos debenan, berdad? O talvez nos ta mira e asunto di un banda so? Por ta cu tin hende cu ta bay bisa, cu si ta asina hopi placa ta drentando, tabata necesario aumenta BBO y introduci BBO na frontera? Esey por parce asina y esun cu ta desea di pensa esey, dal bay. E asunto ta un tiki mas complica si. Pa cuminza, e BBO na frontera tabata un accion pa tene Hulanda y IMF contento, dunando e impresion cu ta bay introduci un BTW, mas den futuro. Awor cu e exito financiero aki, di BBO na 7%, lagando un banda e efecto inflacionario mayor cu esaki por tin, ken ta kere cu lo tin animo den e gobierno aki pa laga e BBO cay y pasa pa un sistema mas bentahoso pa e ciudadano, cu ta menos sensitivo pa inflacion? Henter e trayecto di ultimo añanan a mustra cu simplemente nan no kier introduci un BTW, pa mas cu Hulanda y IMF insisti. Francamente dicho, nos no ta mira e cambio ey tuma lugar mas.

E aumento grandi den entrada di gobierno no ta bin di e medidanan di BBO so; un parti considerable ta bin di crecemento economico. Un otro parti lo por ta bin di accion di cobranza mas efectivo, cu ta trece placa aden sin cu economia ta crece. No mester lubida e pago back di subsidio di salario cu empresanan a ricibi durante e pandemia. Por ta cu mientras nos no a haya e cifranan pa mira, Hulanda si a haya nan como prueba di con bon finanzas publico ta bayendo? Si esey ta asina, e no a haci tanto impresion pasobra na Hulanda nan ta demasiado consciente di e fayonan den e sistema administrativo, por lo tanto nan ta keda insisti, y cu nan razon, cu mester mehora nos administracion financiero. Nos mester tin problema cu esey? Pakico gobierno mester tin problema cu esey? Den mesun sentido por papia tambe di e mayor transparencia cu mester bin den maneho di gasto di personal. Nos mester ta contra? Gobierno den e aña aki ta haya un parti desproporcional di aumento di nos GDP, pa via di e medidanan tuma. Como contraprestacion, ta irazonable exigi administracion drechi…? Parlamento ta na palabra.