Durante reunion parlamentario, pa despedi di miembro cu no lo sigui como parlamentario ayera, formado Evelyn Wever-Croes a splica cu partido MEP lo atende tematico di cual persona lo drenta parlamento a base di cantidad di voto. Parlamentario Marisol Lopez-Tromp di su banda a splica un poco tocante funcion di presidente di parlamento.

 Sra. Wever-Croes a splica cu aunke ley ta stipula cu reparticion di asiento ta bay segun secuencia riba lista, anteriormente partido MEP mescos cu partido POR y RED a palabra den cada un su conseho di partido pa reparti asiento segun cantidad di voto.

“Nos mester papia ainda riba e tema aki pa determina cua lo ta e miho constelacion di parlamentarionan pa sostene e gobierno di coalicion”.

Formacion di gobierno ta canando
E 3 partidonan cu lo forma parti di coalicion ainda ta den negociacion pa determina e reparticion di cartera y tambe e candidatonan cu cada un lo propone pa fungi como cabes di ministerio. “Nos ta den e fase final pa asina finalisa e programa di gobernacion aworaki. Despues di esaki nos lo bay den e parti di reparticion mes, hunto cu e proceso di screening pa posibel ministernan cu mester tuma luga”. E formado ta pidi pasenshi pa e proceso por cana su caminda debidamente, aunke anteriormente tabatin conviccion cu lo por a caba cu e proceso na tempo pa institui un parlamento nobo hunto cu un parlamento nobo.

Sra. Wever-Croes a splica cu e gobierno demisionario tin cierto autoridad limita pa tuma decision den caso cu ta trata di temanan urgente, por ehempel pago di salario. Pero formado a subraya cu e gobierno no tin mag di atende nada nobo durante su fase demisionario. “Mundo no lo caba si no tin gobierno nobo pa un tempo”.

E status demisionario aki tambe ta conta no oficialmente pa presidente di parlamento Mervin Wyatt-Ras, segun sra. Wever-Croes. “Despues di awe e no ta presidente cu tur autoridad mas. E ta fungiendo su funcion ainda te cu parlamento eligi su presidente di parlamento nobo”. E proceso pa eligi un presidente di parlamento nobo ta andando, segun sra. Wever-Croes, te hasta el a bisa cu nan ta den e ultimo palabracionnan pa eligi un presidente nobo. “Nos tin di papia cu e otro partnernan den coalicion, aunke MEP tin su escogencia caba. Despues di e reunion ey nos lo determina esaki. Si no pa diabierna e lo bira pa dialuna ora nos eligi e presidente nobo”. “Ora cu e fase di eligi presidente di parlamento nobo e trabounan lo cuminsa oficialmente”, segun sra. Wever-Croes. “E parlamento ta den transicion, mirando cu tin personanan cu lo bay y bin. Si e parlamento den transicion aki lo mester bay tuma cierto decisionnan of no ta dificil pa bisa actualmente”.

 Mester independisa organo di control di gobierno
Maisol Lopez-Tromp di su banda a subraya e importancia pa e constelacion nobo pone un accento riba e cosnan cu a keda ainda na parlamento. Entre otro ta trata di ley di ombudsman y kinderombudsman, restructuracion di salario pa maestronan y e punto mas importante, segun sra. Lopez-Tromp, ta pa independisa parlamento y otro organonan halto di control manera Conseho Consultativo y Controlaria General.

Esaki a wordo subraya tambe pa Andin Bikker den su discurso hiba dilanti ayera.
Sra. Lopez-Tromp a expresa cu e lo kier sigui sirbi pueblo den su posicion como parlamentario, pero lo warda pa formacion di gobierno tuma luga, pa asina por haya un asiento den parlamento. “Si ta asina cu mi coleganan den partido cu kier forma parti di gobierno nobo bay pa esaki y tin un espacio pa mi por drenta parlamento den un fraccion di POR, lo mi sigui sirbi pueblo como parlamentario”.

Rol di presidente di parlamento
E parlamentario su experiencia di 3 aña como presidente di parlamento, a permiti pa e por comenta riba e funcion importante aki. “Un presidente di parlamento ta un rol hopi diferente cu simplemente un miembro di parlamento. Loke mi a experiencia ta cu aunke bo ta forma parti di un fraccion of un partido, e funcion mester por funciona di manera mas independiente y neutral posibel, pasobra bo ta sinta riba tur e partidonan”.

Sra. Lopez-Tromp tabata honra pa fungi como presidente di parlamento durante 3 aña. Sinembargo algo cu e no tabata mucho contento cu ne, tabata cu e no por hiba debate dilanti: “Como presidente di parlamento bo mester abstene di duna bo opinion como si fuera cu bo tin un klem riba bo boca, pasobra bo tin un otro rol”. Esaki e parlamentario a haya un poco menos, mirando cu e gusta debati.

Tambe sra. Lopez-Tromp a expresa cu algo cu hopi hende no ta consciente di dje, ta cu presidente di parlamento ta den dialogo hopi biaha cu instancianan importante den nos pais. “No ta solamente cu bo mester dirigi reunion como presidente di parlamento, pero tambe pa dirigi e personal di parlamento por ehempel e Griffie di Parlamento.”