Un situacion laboral cu ainda ta andando tin di haci cu e trahadonan di hospital afilia na sindicato ABV, no ta cla ainda tanten presupuesto di hospital no ta wordo defini.
Presidente di ABV, Gina Maduro kende ta representa e trahadonan di enfermeria a declara na Bon Dia Aruba cu despues di e protesta di dialuna siman pasa, e mesun atardi ey nan a bay na mesa di negociacion hunto cu e otro partidonan envolvi.
Den e reunion aki nan a discuti diferente punto, pero nan no por a sigui dilanti cu e negociacion, tanten cu e presupuesto di hospital no ta acorda ainda via AZV. Esaki ta pone -segun presidente di ABV- cu no tin suficiente informacion concreto pa evalua kico nan ta bay negosha.
E hecho aki ta pone cu e partidonan a yega na acuerdo cu mientras tanto cu no tin mas informacion tocante e presupuesto destina pa atende cu hospital su gastonan entre otro di personal, nan contracto colectivo (CAO) ta keda vigente.
Encuanto e situacion cu lo por a surgi despues cu gabinete di premier Mark Rutte a cay na Hulanda, e sindicalista ta spera cu e 12.5% y tambe e suma di 5 miyon cu Hulanda ta corta ‘inhusto’ den cuido, tambe cay hunto cu e gobierno aki.
