Desde un edad jong Tamara Boekhoudt tin un amor grandi pa bestia y aworaki como adulto e amor aki a crece mas te cu e ta dedica gran parti di su tempo na yuda e animalnan cu mas mester di dje. Tamara ta conta den un entrevista kico a inspire pa cuminsa cu trabou boluntario.

BDA: Desde ki edad bo a cuminsa cu trabao boluntario y kico a inspirabo pa cuminsa?

TB: “Desde cu mi ta chikito, nos famia semper a adopta di Animal Shelter. Y mi a wak Kill Cage ora e tabata existi y e ta laga un mal memoria atras. Ora mi tawata tin 11 anja mi a muda bay Hulanda. Hende na Hulanda ta pensa tres biaha prome nan trece un mascota den cas. Nan ta wak tur aspecto, financiero y si nan tin bastante luga pa nan den nan cas y si nan tin tempo pa nan. Ora mi a bolbe bek Aruba, mi ta ripara cu Aruba no ta asina. Cu cachonan ta pa nan cuenta. Nan ta drumi den terra pafo di cura, hopi ta mustra mahos y malo.

Casi nunca bo ta wak hende ta hunga cu nan cacho. Semper mi a pensa cu door di adopta mi tabata yuda bastante, pero despues di 10 aña na Sint Maarten unda tambe tin hopi problema de cacho riba caya, y mi tawata mas actief den yuda y mi a siña hopi tocante e mentalidad irresponsable cu local nan tin encuanto di mascota. Mi a bolbe Aruba atrobe na 2015 y mi di cu mi mes, mi ta bai cuminsa foster. Mi a foster mi prome cacho y mi dura como 15 minuut como foster prome cu mi a adopta e cacho. Di eynan mi mester a cambia mi mente con mi por yuda pasobra mi por adopta cada cacho u mi tuma aden. E ora ey mi a bai un show di cachonan di caya na Villa Florina y ey nan tabatin tur e fundacionnan y mi a join Luna Foundation.”

BDA: Kico ta bo parti faborito di e trabou boluntario cu bo ta haci y kico ta bo parti menos faborito?

TB: “E parti mas bon ta ora tin un happy ending. Dus cu e cacho cu bo a rescata a haya su cas perfecto cu lo stime y cuide te dia e bay. E parti mas malo ta ora hende ta puntra pa ayudo, pero nan mes no kier haci nada, nan kier pa abo busca e cacho, bay veterinario, y trece e cacho. Nan ta haya tur cos paga, pero nan no kier susha nan auto of traha tempo pa hiba cacho clinica. Y si bo bisa no, nan ta rabia, bisa cu ami no ta stima cacho anto.”

BDA: Den tur e tempo cu bo tin haciendo e trabou aki, kico ta loke ta mas dificil?

TB: “Pa mi siña e ley tabata dificil, pasobra tin hopi di comienso di aña 1927. E leynan a wordo cambia cada tanto tempo. Pero den practica e no ta funcionamwa. Y si bo sigui puntra pakico e sobre populacion no ta controla bo ta haya sa, cu 1. no tin budget, 2. polis hopi biaha no tin interes di bay tras di casonan di cacho. E aña aki so tabatin un persona so cu a wordo castiga pa abuso di animal, y esey no ta pasa at all den tur e tempo cu Aruba tin Status Aparte.

BDA: E problema a bira pio of a mehora si compara cu por ehempel cinco aña atras?

TB: “Cinco aña atras ainda Kill Cage tabata existi, y danki Dios a sera esey, pero e daño ya a wordo haci. Hendenan tin den nan memoria cu tin un luga pa dump bo cacho y gobierno ta mata nan gratis pa bo y e doño por laba su man despues. Tambe locual recien mi ta notando den e comments riba internet, hopi hende ta corda di e tempo cu polis tabata tira mata cacho cu nan ta haya riba caya, y pa un motibo of otro nan kier esaki bek. Pero nan no ta realisa, cu den tur e añanan aki, esaki no a resolve e esencia di e problema, cual ta e doño di mascota irresponsable. Gobierno a malcria e hendenan y den mesun acto a haci nan mas cruel door di haya ta ok pa mata cacho links en rechts, pero no ta sterilisa of cuida cacho (y pushi) at all. Y awo, tur hende kier pa gobierno resolve e problema, pero e problema ta nan mes.”

BDA: Bo tin meta di lanta bo propio fundacion pa yuda bestianan riba caya?

TB: “Mi tabatin e meta ey di cuminsa mi mesun fundashon. Pero ora bo wak bon, tin bastante fundacion, pero no tin bastante boluntario. Mester di hende cu ta fisicamente fuerte, cu no ta give up y cu por procesa situacionnan unda bo no por yuda, sea e cacho of pushi ta mucho malo, of simplemente e doño ta haci dificil. No por salba tur cacho, pasobra no tin suficiente hende pa yuda salba nan tur, no tin suficeinte luga pa pone tur y no tin placa pa hiba tur veterinario. Mi ta hopi contento di wak ora e fundacionnan ta uni otro pa traha riba un proyecto nobo y grandi.”

“Den temporada di covid no tabata por haci mesun hopi cos cu prome. Mi a cuminsa e pagina Street Dogz of Aruba. Mi djis a cuminsa investiga e leynan di Cacho di Aruba, di Antiyas, busca informacion di kico gobierno a haci of no a haci, ken tabata e prome nan den rescate di animal domestico, y mi tabata pensa, por ta ni un hende ta wak e pagina aki, pero mi tin e informacion na un lugar. Poco poco e pagina a bira un lugar cu e comunidad di rescate ta usa pa haya informacion lihe. Asina hopi cacho y pushi pafo di fundacionnan a wordo yuda. Semper mi a bisa si bo por, yuda salba uno extra cu e fundacionnan simplemente no tabata por yuda e momento ey. Tur esaki, con chikito e por ta, bo ta yudando pa cambia mentalidad di hende, pasobra mas hende wak e realidad di cacho di caya y di pushi di caya, mas nan lo pensa prome cu dicidi pa no sterilisa nan mascota, of talbes no tuma mascota mes te ora nan ta mihor para den bida.”

BDA: Kico ta bo mensahe pa comunidad di Aruba?

TB: “Mi mensahe ta sea responsable den tur bo decisionnan, pero mas ainda ora bo ta pensa di tuma aden un mascota, un ser viviente. Nan por sufri, nan por pasa hamber, nan mester di amor y bo tempo y mas ainda, si bo no tin placa pa ni paga e adoption fee, con bo ta bai paga pa cuminda, e medicina di tur luna contra carpata y bichi di curazon y nan vacuna y cualkier cos medico cu lo ta necesario den un emergencia. Un cacho ni un pushi por ta algo cu un persona ta dicidi di tuma ora cu ta pasando den momento duro na cas. Mester pense bon. Tur hende kier e cariño di un mascota, pero bo mester merece.”