Despues di a entrega mi zienswijze riba e cROPV riba 28 di november mirando cu esaki ta perhudica mi persona y mi famia completamente. Y no solamente e cROPV, pero henter e maneho di DIP y su precursor, cu durante decadanan a haci mal uzo di nan poder pa medio di nan maneho cu terenonan priva.

Mirando tur esaki y siguiendo conseho di e abogado cu a yuda nos den henter e trayectoria, awe dia 2 di december 2019 manda un carta pa AHATA y ATA pa stop di propaganda Wariruri como tambe stop benta di tours cu ta menciona of para na Wariruri. Fuera di esey ta preparando pa cera e caminda pa drenta e propiedad. Unico forma pa haci uzo di e luga ta na pia of riba bicicleta.

Nos storia ta cuminsa cu e compra di e tereno di Wariruri, conoci den registro como 1-M-11 (e baai di Wariruri), na 1966 door di mi tata Julius Richard Lope Beaujon. E la cumpr’e e tempo ey cu e intencion di traha un par di bungalows pa uzo den weekend y vakantie. E la te hasta laga pone un tanki di awa fresco pa ora pasa dia eynan.

E recuerdonan di e paisahe di e tereno tempo mi tabata mucha ta completamente diferente cu loke tur hende conoce awe. E unico dos cosnan cu a keda casi mescos ta e natural bridge chikito conoci como ‘baby natural bridge’ y e barancanan den e rooi. Di resto tur pero tur cos cu tabata hacie un di e paisahenan mas bunita y unico di Aruba su naturalesa a wordo completamente masacra door di decada di mal

maneho di DIP y su precursor.

Un tereno cu tabata tin un cero immenso di santo blanco (duin) yen di cocorobana y yuco. Un cero asina grandi cu no por a ni wak e beach of lama awe no tin ni un rastro di esaki mas. Con esaki a pasa?

Pa decadanan esunnan encarga cu e departamento di infrastructura a duna permiso (vergunning y despues toezegging) na Jan, Piet en Klaas pa coba santo na nan Amen.Despues na nomber di turismo atrobe Jan, Piet en Klaas tabata haya permiso pa drenta tereno priva y destrui esaki, loke a keda di cobamento, cu ATVs y UTVs como tambe cabay. Cuanto a wordo cobra na turista pa haci uzo di tereno priva…nan so sa! Pero nos nunca a mira un cen preto di esaki y pa colmo e situacion nos nunca por a haci nada cu e tereno pa genera placa.

Cosnan a bay asina leu cu un momento dado mi tata a laga cera e caminda cu ta pasa den e tereno pero a caba ta habri esaki bek riba peticion di grenspolitie den nomber di “algemeen belang.”

Na 2004 mi tata a fayece y nos a bay over na bende e tereno un accion cu a bay caba te na Hoger Beroep pasobra cu cada bes nos haya benta esaki tabata cay for di otro despues cu cliente bishita DIP.

Awor cu introduccion di e ROP y cROPV nos a bin ripara cu nos tereno awor ta bay cay bao di zona berde, o sea, Landschap y absolutamente nada pero nada por wordo haci riba dje, pero SI companianan priva cu ta bende tours rond di nos isla por sigui genera placa riba nos custia. Mas aleu, nos turismo por sigui bende Aruba propagandando nos tereno riba website pa atrae turista pa Aruba… y nos net pero net nada, cero, nul.

*Nota di redaccion: E zienswijze completo di sra. Beaujon ta disponibel riba nos pagina di internet, bondia.com. Click e link aki: https://drive.google.com/file/d/0B8SX_XUfZAfaNGIzSzJzZ0lCZzVfR0cxbFRXS25GUlJNenVF/view?usp=sharing