(AP) – Taliban a tene ehecucion dialuna di un homber acusa di asesinato na Afghanistan mientras miles tabata mira na un stadion di deporte, e tercer sentencia di morto di su tipo cu a ser ehecuta den e ultimo 5 dianan.

E ehecucion a tuma luga mientras tabatin caida di sneeuw pisa na Shibirghan, e capital di e provincia Jawzjan, unda e ruman di e homber asesina a los 5 tiro contra e acusado cu un rifle, segun un testigo. Siguridad alrededor di e stadion tabata fuerte, segun e testigo, ken a papia bao condicion di anonimidad pa motibo cu e no tabatin autorisacion di papia cu media.

Esaki tabata e di 5 ehecucion desde cu Taliban a tuma poder na Afghanistan den augustus di aña 2021 ora cu Trupanan Mericano y di NATO tabata den e simannan final di nan salida for di e pais despues di dos decada di guera. E Taliban, a pesar di promesanan inicial di un mando mas modera, a cuminsa duna castigonan severo den publico, manera tiramento di piedra y ehecucion, poco despues cu nan a drenta den mando. E castigonan ta similar na esunnan duna durante nan mando anterior di Afghanistan den fin di aña 1990.

Corte Supremo di Taliban a bisa den un declaracion cu dialuna su sentencia di morto a ser ehecuta despues di aprobacion di e pais su 3 cortenan mas halto y e lider supremo di Taliban, Hibatullah Akhundzada. E homber ehecuta, identifica como Nazar Mohammad di e provincia Faryab, tabata acusa di asesina Khal Mohammad ken tambe ta di Faryab.

Riba diahuebs den e provincia di Gazni, Taliban a ehecuta dos homber acusa di a staca 2 victima mortalmente. Familiarnan di e victimanan a los tiro contra e dos hombernan tambe na un stadion di deporte, mientras miles di persona tabata mira.

Declaracionnan separa for di e Corte Supremo a bisa cu un homber y muhe acusa di adulterio a ser golpia cu 35 laso cada un na e provincia di Balkh durante fin di siman. Dos otro persona a ricibi 30 golpi cada un, tambe durante e fin di siman, bao acusacion di comete actonan inmoral.

Nacionnan Uni a critica Taliban fuertemente pa e castigonan severo aki den publico desde cu nan a drenta mando y a haci yamado na e pais su autoridad pa para e tipo di practicanan aki.