E Taliban a bombardia e capital di Afganistan diahuebs ultimo, matando por lo menos 10 persona, incluyendo 5 hende muhe y 1 mucha – esaki mientras hefenan di gabinete Mericano tabata bishitando Kabul, segun autoridadnan.
General Joseph Dunford tabata na Kabul pa un reunion cu presidente Ashraf Ghani, segun un comunicado manda pa e presidente di Afganistan su oficina. E grupo conoci como Taliban a asumi responsabilidad pa e atake net despues cu e comunicado a sali.
E prome atake tabata ehecuta pa un terorista suicida riba un brommer. El a dicidi di explota su mes dilanti un bus riba cual tabatin empleadonan di ministerio di mineria, segun Nasrat Rahim, un vocero di ministerio di asuntonan interno.
Un auto terorista poco tempo despues a explota den oost di e capital, segun agente policial Abdul Rahman, kende a bisa cu e terorista a purba ataca forsanan di coalicion internacional na Kabul. Sinembargo, tropa di NATO a bisa Associated Press cu nan militar no tabata presente na e sitio ora cu e explosion a tuma luga.
E di 3 explosion tabata mas chikito, genera pa un mashin magnetico laga cerca di unda e atake riba e bus a tuma luga. E ultimo atake aki no a causa morto, segun Rahim, Vocero pa e Ministerio. Apart di e mas o menos 10 persona cu a fayece pa via di e explosionnan, por lo menos 41 persona a keda herida pa via di e atakenan, segun Wahidullah Mayar, Vocero di Ministerio di Salud.
