Ayera mainta Lisette Gomes di Fundacion Lisette Gomes a bay entrega carta cu informacion na e presidente di Parlamento y tres minister. Minister encarga cu Salubridad, Asuntonan Social y Husticia. E informacion ta encera detayenan pa asina nan ta presente pa ora cu e fundacion haci entrega di manifestacion otro siman.
“Dia 27 di april lo tin un manifestacion contra abuso sexual di mucha pues lo ta entregando un peticion na Parlamento y ministernan pa cambionan entre otro den e sistema cu ta atende e casonan. Y na Parlamento pasobra ta kere cu mester di castigonan mas halto y mas severo. Pues lo tin diferente punto den e peticion aki. No tin e full cla ainda, tin bastante punto.” Segun Sra. Gomes lo bay duna un fecha final pa esaki ya cu 6 aña pasa Parlamento tabatin un team caba pa haci investigacion pues no ta mira pakico e mester ta algo cu mester dura añanan atrobe,” Sra. Gomes a bisa Bon Dia Aruba.
6 aña despues
Seis aña pasa a entrega 11 mil firma y peticion, desde e tempo ey e unico cos cu por bisa ta cu JZP a haya e ekiponan pa video e interogacion . Indicacionnan di investigacion di e partnernan ta indica cu nan tin resultadonan di ki cambio mester bin, pero tur cos a keda pega rond di e placa. Pues nunca a aloca placa pa atende cu e problema aki specificamente. Segun Sra. Gomes, no sa si ta pasobra nan ta pensa cu e cifranan ta minimo pasobra un caso mes ta suficiente.
Cambio mentalidad
“Aworaki mi ta mira cu taboe a wordo kibra mas, cu hendenan ta papia mas y kehonan ta wordo entrega mas.” El a sigui cu p’esey e ta kere cu manifestando aworaki lo bay haci un diferencia y si no haya contesta ta bay bin cu cosnan mas grandi pa hala atencion di e gobernantenan pa asina duna e tema aki e atencion cu ta pidi, Sra. Gomes a termina bisando.
