Recientemente hefe di departamento di Recurso Humano (DRH), Omaira Lares ta aclaria cu como ambtenaar cu 36 aña na servicio di gobierno, e ta limita su mes di cumpli cu su funcion cabalmente y leu di politica. Sinembargo e no ta descarta cu den aparato gubernamental nombramento politico tabatin y lo bay tin tambe.
El a indica cu ora cu un hende ta wordo recomenda politicamente, asina e peticion ta drenta DRH ta averigua si e hende ta adecua pa traha den e funcion pa medio di cual el a wordo tuma. Kiermen si e persona tin e papelnan necesario y si e persona ta adecua pa traha tambe.
“Bo no por ta solamente un dokter, anto bo ta bin traha na telefonista. Pero bo mester ta un telefonista pa bo por traha como telefonista.” Si e persona no ta cualifica pa e funcion segun sra. Lares nan tin cu bisa e mandatario concerni cu locual e ta haciendo no ta corecto, pasobra esey ta afecta e calidad di servicio. Ademas nan ta adverti e mandatario cu e ta bay tuma un decision incorecto.
E ta haya cu tin biaha e mandatario ta scucha di DRH. Pero tambe tin biaha cu e mandatario ta tuma e persona pa ya sea un periodo di un aña of dos aña pa wak con e ta funciona. “Mi tarea no ta esun di mas facil. Mi ta kere cu den tur e ministernan cu tin, mi no ta esun di mas gusta. Pasobra mi ta bisa e cos manera cu e ta.”
Influencia politico den nombramento
Ainda tin influencia politico pa nombramento di personal di gobierno, pero e no por bisa pa ehempel si e ta mas of menos cu 10 aña pasa. Sra. Lares ta haya cu mester ta consciente cu nos ta biba den un pais chikito caminda un ta yuda otro.
DRH tin personal cu ta atende cu asunto di personal interno y nan ta yuda pa guia e proceso pa trece den aparato publico e nivel di calidad mas halto. “Ora cu bo ta bin cu personal di calidad mas halto ta nifica cu integridad tambe ta subi, muy specialmente den funcionnan vital y di risico.”
Reduccion di personal
Encuanto e maneho di reduccion di personal for di aparato gubernamental, e ta kere cu no ta tur ora mas hende ta duna miho servicio.
Tin departamento manera e diferente cuerpo uniforma cu ta demanda mas personal pa ofrece un miho servicio pa nos comunidad. Pero DRH ta pone atencion pa busca e miho hendenan pa brinda e miho servicio. “Mas hende no ta nifica miho servicio”, e ta enfatisa.
DRH ta yuda selecta e persona corecto pa duna e servicio. Aruba tin un aparato di gobierno hopi grandi. Tin departamento cu tin demasiado personal, mientras otro no tanto. Eynan eventualmente lo por traspasa personal di un departamento pa otro pa mantene un bon servicio.
Tambe gobierno tin mas cu 80 departamento cu DRH tin cu maneha. Nan tarea ta cu no necesariamente nan tin cu busca mas hende, ya cu e no ta kere cu esey ta e solucion. Mientras cu un personal cualifica cu ta haya training y curso, DRH ta consider’e un recurso hopi importante.
Manera digital
Sra. Lares ta comparti cu mester corta personal den cierto area di aparato gubernamental. Pero despues di un analisis nan ta bay duna un opinion tocante e tema aki. Nan tin un analisis pero e ta bieu caba. Tambe mester tuma un decision riba cual ta e tarea pa pais Aruba mester carga pa asina determina cuanto hende mester y con nan por haci’e mas eficaz. E ta un decision politico caminda DRH por duna conseho. Ora cu e decision cay nan por sigui guia e proceso di busca y/of reubica e personal, segun nan preparacion y training. Pero e proceso aki ta exigi inversion di parti di DRH tambe.
Nan mester evalua den otro departamentonan ki tipo di trabou nan ta haci pa wak con nan por haci’e mas eficiente. E no ta descarta cu awendia tin hopi manera digital cu por yuda facilita cierto proceso y trabou den aparato gubernamental. Esey ta e manera cu directora di DRH ta kere cu nos como un pais chikito mester busca mas.
