Representante di personal di Guarda Nos Costa a manda un carta pa Minister di Husticia, Rocco Tjon riba e decision pa duna ciudadano di nacionalidad Dominicano, Ariel Yamir Lopez, kende contra decision di huez di LAR De Haseth, a haya un permiso temporario for di Minister Glenbert Croes.

Protesta di personal di Guarda Nos Costa a bira conoci durante e reunion publico riba LIM. Tabata un protesta na momento cu contra decision di huez, Sr. Lopez – kende mester a keda expulsa di Aruba – na ultimo momento toch a haya un permiso di Minister Glenbert Croes cu diahuebs apenas a haya encargo di DIMAs.

E Minister a haya pregunta riba e caso aki, tanto di fraccion di AVP como fraccion di MAS y Sr. Croes a bisa cu a tuma e decision a base humanitario. Ta trata di un cabayero cu ta den relacion cu un Arubiano y hasta a bira tata. Minister Tjon na e momento ey a bisa cu e no ta bay papia di e decision di LAR.

Bon Dia Aruba a lesa e decision di LAR di 12 di Januari 2022. Manera ta conoci, LAR ta e Corte Administrativo cu ta dicidi si Gobierno a actua corecto of no. Ariel Lopez a apela e decision pa no a dun’e un permiso laboral.

Minister di Husticia y Integracion, encarga cu DIMAS e momento ey, esta Sr. Rocco Tjon a duna instruccion dia 17 di November 2021 pa expulsa Sr. Lopez di Aruba. Lopez a apela e decision aki dia 8 di December 2021 y LAR a trata e caso dia 29 di December 2021.

E instruccion di Minister di Husticia tabata cu Sr. Lopez mester bay y keda for di Aruba pa 8 aña.

A usa entre otro e cuadro legal di e Ley Admision y Expulsion, articulo 15, inciso 1 sub d, cu ta bisa cu entre otro por expulsa un persona si su permiso a caduca y cu Minister di Husticia ta encarga cu e expulsion.

No tabatin permiso

E punto ta cu Sr. Lopez nunca tabatin un permiso di trabao. Minister di Integracion, den e caso aki Sr. Tjon por nenga permiso pa motibo di orden publico, interes general y mercado laboral. Y Lopez, kende no tabatin permiso, lo por a apela e decision aki cu e argumento cu no tin otro meta di estadia pa cual el a bin Aruba; of cu e ta na Aruba caba y ta cumpli cu e condicionnan minimo pa haya su estadia y tin tur e legesnan paga. E asina yama hardheidsclausule (red. cu ta e posibilidad pa un organo publico desvia di ley si en caso su enforsamento por produci consecuencianan negativo imprevisto y desproporcional pa e ciudadano) ta conta pa un ciudadano di Reino cu a bira parti di comunidad di Aruba, tin motibo humanitario cu e persona lo por keda, a nace na Aruba of ta na Aruba for di edad chikito y otro.

Caso Lopez

Ariel Lopez a drenta Aruba dia 7 di November 2019 como turista y tabatin 30 dia maximo pa keda Aruba. Dia 28 di Januari 2020, el a entrega su prome peticion di labor, pa traha den cas di hende. Pero Dia 21 di April, Minister di Integracion kende e tempo aya tabata minister Andin Bikker, a nenga e peticion.

Lopez a apela e decision y dia 16 di November 2020 a rechasa e apelacion.

Tabata durante un control di trafico dia 17 di November 2021 cu polis a topa cu Sr. Lopez y a entreg’e na Guarda Nos Costa. Minister di Integracion, Sr. Rocco Tjon a ordena su expulsion y a bisa cu Lopez no por drenta Aruba pa 30 luna.

Dia 12 di December 2021, Ariel Lopez a entrega peticion pa permiso basa riba motibonan special. El a splica cu e ta biba cu un Arubiano y cu nan a haya un yiu. Su argumento tabata articulo 8 di Tratado Europeo di Derechonan Humano, EVRM.

LAR

E decision di LAR ta uno di caracter temporario y no ta mara na un caso di prome instancia di Corte. Huez di LAR a bisa di ta compronde e peticion pa e ‘hardheidsclausule’ pero a rechasa e argumento, ya cu Minister di Integracion por haci uso di su autoridad pa expulsion.

Huez no a considera cu Lopez a cumpli cu tur condicion pa e permiso. Sr. Lopez no por a mustra cu tin un obhecion obhetivo cu ta strob’e cu e por tin un bida familiar (cu su pareha y yiu) na su pais. Ademas, a considera cu su argumento tabata contene diferente punto cu no tabata corecto ni tin splicacion y como tal a rechasa e peticion.

Manera ta conoci, Minister di Integracion, Sr. Glenbert Croes a cambia di pensamento y a duna Sr. Lopez un permiso temporario na ultimo momento y esaki a conduci na e protesta.

Bon Dia Aruba a manda pregunta pa Minister di Husticia, Sr. Tjon riba su pensamento, pero no a haya reaccion. E Minister a bisa Parlamentarionan cu e no ta bay papia di e sentencia.

Ta keda pendiente riba e carta cu personal di Guarda Nos Costa a manda na Minister.