Mientras Europa ta atravesa olanan di calor, Nort America, Centroamerica y Caribe tambe por experimenta esaki. E situacion por bira pio entre juli y augustus, provocando daño pa salud.
Organisacion Panamericano di Salud y Organisacion Mundial di Salud (OPS/OMS) ta urgi paisnan den e region pa prepara, debi na e daño cu e olanan di calor por causa den salud di persona, causando incluso morto.
E prediccionnan meteorologico pa Nort America, Centroamerica y Caribe ta indica cu durante berano di 2019 ta spera olanan di calor, condicionnan cu por aumenta stress causa pa secura, provoca candela forestal, y ocasiona efecto riba salud humano.
Plan pa enfrenta ola di calor
Pa cu e situacion aki, OPS a elabora un guia pa duna sosten na paisnan den continente Americano den e desaroyo di plan di contingencia pa enfrenta ola di calor. E guia aki ta duna recomendacion pa sector di salud y agencia di meterologia pa prepara y responde miho pa cu e menasa aki, promove salud, preveni efectonan adverso di ola di calor, duna tratamento na persona afecta y scapa bida.
E guia di OPS ta destaca cu e plan di contingencia pa ola di calor mester caracterisa e grado di e menasa, conta cu procedura pa activacion di alerta, rol y funcion, y establece mecanismo di coordinacion intra- y inter- institucional.
Ademas, e documento ta señala cu e paisnan mester fortalece vigilancia epidemiologico di morbilidad y mortalidad asocia cu calor, capacidad di servicio di salud, y reforsa accion di autoridad local, medionan di comunicacion y comunidad, tocante accionnan di respuesta interinstitucional y medida di prevencion y cuido propio.
Efecto di olanan di calor riba salud
Calor por causa sintomanan severo, manera cansancio pa calor y golpi di calor – un condicion den cual e persona ta presenta perdida di tino, ademas di cuero cayente y seco, debi na fayonan den e organismo pa controla e temperaturanan halto. Mayoria di morto pa calor ta debi na agravacion di malesa cardiopulmonar, renal, endocrino y psikiatrico. Otro sintomanan leve ta inclui edema den miembronan inferior, erupcion riba nek pa via di calor, cramp, dolor di cabes, iritabilidad, letargo y debilidad.
Persona cu ta padece malesa cronico, cu ta bebe remedi tur dia, tin mas riesgo di complicacion y morto durante un ola di calor, asina tambe adultonan mayor y mucha.
E reaccion na calor ta depende di e capacidad di adapta di cada persona, y e efectonan grave por aparece diripiente, pa cual motibo ta hopi importante pa keda pendiente di alerta y recomendacion di autoridad local.
