Manera tur aña un grupo grandi di studiante a scoge pa sigui studia na un hogeschool of universidad na Hulanda. E grupo aki ta biahando pa Hulanda dianan 1, 2 y 4 di augustus proximo. Mundialmente ainda nos ta enfrenta retonan pa motibo di e situacion cu e virus di COVID-19. Obviamente esaki por tin consecuencia tambe pa e grupo cu ta preparando pa biaha pa Hulanda proximamente.
Departamento di Enseñansa Aruba (DEA) ta uni su mes na e suplica di Arubahuis y mentoren, na beursalen 2021 y mayornan urgiendo nan pa sea responsabel y cuida curpa y evita fiesta y aglomeracion prome cu e biahe pa Hulanda.
Studiantenan cu tin sintoma na yegada na Hulanda y/of resulta di ta Covid positivo tin cu bay den cuarentena y/of isolacion mesora y NO por participa na e programa di opvang.
Teniendo esaki na cuenta Arubahuis y mentoren ta haci un suplica na tur studiante cu ta biahando cu beursalen 2021 pa por fabor cuida curpa y pa evita fiesta y aglomeracion e dianan prome cu salida for di Aruba.
Aunke un studiante ta vacuna e por wordo infecta y transmiti e virus pa demas persona cu posibel consecuencianan grave pa e programa di opvang y pa tur esnan envolvi. Arubahuis y mentoren kier conscientisa y adverti tur studiante y nan mayornan riba e consecuencianan grandi cu un posibel infeccion positivo ta trece cune na yegada na Hulanda:
• Studiantenan mester bay den isolacion den propio vivienda.
• Den caso cu studiante no ta dispone di vivienda, den caso cu e vivienda no ta
disponibel of muebla na yegada studiante ta keda responsabel pa regla un lugar unda
cu por isola cerca famia y/of amistadnan na Hulanda.
• Gastonan di test, isolacion y cualkier otro gasto ta keda responsabilidad di studiante
y mayornan.
• Keda sin por participa na e programa di opvang pa motibo di Covid significa cu
studiante no por atende citanan y regla asuntonan importante cu mester keda cla na
tempo pa por establece su mes oficialmente na Hulanda y pa por cuminsa cu su scol.
Ta e deber y responsabilidad di Arubahuis y mentoren pa informa tur studiante y mayor di esaki y pa aplica e reglanan aki na un manera estricto pa asina proteha tur studiante y demas personanan y instancianan envolvi.
Nos ta haci un apelacion riba tur studiante y nan mayornan pa por fabor cuida curpa y pa ta responsabel prome cu salida pa Hulanda sino e ta imposibel pa Arubahuis y mentoren por garantisa salud y siguridad di tur studiante y personal.
Pa mas informacion relaciona cu Studiamento na Hulanda por acudi na nos website www.ea.aw y por sigui nos den social media via nos pagina di Facebook y Instagram @EducationAruba.
